అమెరికాతో యుద్ధం, ముంచుకొస్తున్న దాడుల ముప్పు, ఆర్థిక ఆంక్షల ఉచ్చు.. ఇన్ని కష్టాల మధ్య కూడా ఇరాన్ తన ప్రజాస్వామ్య ప్రక్రియను ఆపడం లేదు. దేశంలో అత్యంత ఉద్రిక్త పరిస్థితులు నెలకొన్నప్పటికీ, మే 1వ తేదీన ‘సిటీ అండ్ విలేజ్ కౌన్సిల్’ (స్థానిక సంస్థల) ఎన్నికలు నిర్వహించనున్నట్లు ఇరాన్ ప్రకటించింది. ఒకవైపు యుద్ధ సన్నాహాలు చేస్తూనే, మరోవైపు ఎన్నికలకు సిద్ధమవ్వడం అంతర్జాతీయంగా చర్చనీయాంశమైంది.
అమెరికా నమ్మకాన్ని పొందలేకపోయింది: గాలిబాఫ్
పాకిస్థాన్‌లో జరిగిన ‘ఇస్లామాబాద్ చర్చలు’ విఫలమైన తర్వాత ఇరాన్ పార్లమెంట్ స్పీకర్ మహమ్మద్ బఘేర్ గాలిబాఫ్ తొలిసారి అధికారిక ప్రకటన చేశారు. ఈ చర్చల వైఫల్యానికి అమెరికానే కారణమని ఆయన నిప్పులు చెరిగారు.
“చర్చలు జరపాలనే చిత్తశుద్ధి, సంకల్పం మాకు ఉన్నాయి. కానీ గత రెండు యుద్ధాల అనుభవాలను దృష్టిలో పెట్టుకుంటే.. మాకు అమెరికాపై ఇసుమంతైనా నమ్మకం లేదు. ఈ దఫా చర్చల్లో కూడా ఇరాన్ ప్రతినిధుల నమ్మకాన్ని గెలవడంలో అమెరికా పూర్తిగా విఫలమైంది.” అని గాలిబాఫ్ ‘ఎక్స్’ (X) వేదికగా ఎద్దేవా చేశారు.
9 కోట్ల మంది ఒకే మాట.. ఒకే బాట!
సుమారు 21 గంటల పాటు సాగిన సుదీర్ఘ చర్చల్లో పాల్గొన్న తన సహచరులను గాలిబాఫ్ ప్రశంసించారు. ఇరాన్ అంటే కేవలం ఒక దేశం కాదని, అది 9 కోట్ల మంది వీర సైనికుల దేహమని ఆయన అభివర్ణించారు. సుప్రీం లీడర్ పిలుపు మేరకు రోడ్లపైకి వచ్చి తమ పాలకులకు మద్దతుగా నిలిచిన ప్రజలకు ఆయన కృతజ్ఞతలు తెలిపారు.
ట్రంప్ ‘ఫైనల్ ఆఫర్’.. ఇరాన్ ఏమంటుంది?
40 రోజుల భీకర పోరాటం తర్వాత అమెరికా అధ్యక్షుడు డొనాల్డ్ ట్రంప్ రెండు వారాల కాల్పుల విరమణను ప్రకటించిన సంగతి తెలిసిందే. దీనిని శాశ్వత శాంతిగా మార్చేందుకు ఏప్రిల్ 9, 10 తేదీల్లో ఇస్లామాబాద్‌లో చర్చలు జరిగాయి.
- అమెరికా వెర్షన్: అమెరికా ఉపాధ్యక్షుడు జెడి వన్స్ ఈ చర్చలు విఫలమయ్యాయని ప్రకటించారు. తాము ‘ఫైనల్ ఆఫర్’ ఇచ్చి వెళ్తున్నామని, దీనిని అంగీకరించకపోతే ఇరాన్‌కే నష్టం అని హెచ్చరించారు.
- కాల్పుల విరమణ గడువు: ప్రస్తుతం అమలులో ఉన్న కాల్పుల విరమణ గడువు ఏప్రిల్ 22తో ముగియనుంది.
ఒకవైపు అమెరికా ‘ఆఖరి అవకాశం’ అంటూ డెడ్‌లైన్ విధిస్తుంటే, మరోవైపు ఇరాన్ తన దేశంలో స్థానిక ఎన్నికల నిర్వహణకు సిద్ధమవుతోంది. యుద్ధం ముంచుకొస్తున్నా ఎన్నికల వైపు మొగ్గు చూపడం ద్వారా.. తాము దేనికీ భయపడటం లేదనే సంకేతాలను ఇరాన్ ప్రపంచానికి పంపుతోంది.