చాలామంది యజమానులు ఇల్లు అద్దెకు ఇచ్చేటప్పుడు రాతపూర్వక అద్దె ఒప్పందం (Rental Agreement) చేసుకోరు. కానీ చట్టపరమైన భద్రత కోసం ఒప్పందం చేసుకోవడం ఎల్లప్పుడూ మంచిది. సాధారణంగా ఈ అగ్రిమెంట్ 11 నెలల కాలానికి ఉంటుంది. ఈ గడువు ముగిసిన తర్వాత యజమాని, అద్దెదారు ఇద్దరూ ఇష్టపడితే కొత్తగా మరో 11 నెలల ఒప్పందం చేసుకోవచ్చు.
అద్దెదారు ఇల్లు ఖాళీ చేయడానికి నిరాకరిస్తే?
సాధారణంగా అద్దె ఒప్పందంలో ఇల్లు ఖాళీ చేయడానికి 1 నుండి 3 నెలల ముందు నోటీసు ఇవ్వాలనే నిబంధన ఉంటుంది. యజమాని ఖాళీ చేయించాలన్నా ముందే చెప్పాలి. ఒకవేళ 11 నెలల గడువు ముగిసి, యజమాని ఖాళీ చేయమని చెప్పినా అద్దెదారు వినకపోతే యజమాని ఏం చేయాలి?
చాలామంది యజమానులు చేసే పెద్ద తప్పు అద్దెదారుతో గొడవ పడటం. ఇంటికి తాళం వేయడం, గేటుకు తాళం వేయడం, సామాన్లు బయట పడేయడం, కరెంట్ లేదా నీటి కనెక్షన్ కట్ చేయడం వంటివి చట్టరీత్యా నేరాలు. యజమానులు ఇలాంటి పనులు అస్సలు చేయకూడదు.
సరైన మార్గం ఏంటంటే:
న్యాయవాది (Lawyer) ద్వారా అద్దెదారుకు ‘లీగల్ నోటీసు’ పంపాలి. అద్దె ఒప్పందం ముగిసిందని, నిర్ణీత గడువులోగా ఇల్లు ఖాళీ చేయాలని అందులో స్పష్టంగా పేర్కొనాలి.
ఖాళీ చేయించాలనుకున్నప్పుడు అద్దె తీసుకోకండి!
ఒప్పందం ముగిసిన తర్వాత అద్దెదారుని కొనసాగించడం మీకు ఇష్టం లేకపోతే, వారి నుండి తర్వాతి నెల అద్దెను తీసుకోకండి. మీరు అద్దె తీసుకుంటే, వారు ఆ ఇంట్లో ఉండటానికి మీరు అనుమతించినట్లు చట్టం భావిస్తుంది. వారు అద్దె ఇవ్వబోతే, దానిని నిరాకరిస్తున్నట్లు స్పష్టంగా చెప్పండి. ఈ నిరాకరణ రాతపూర్వకంగా ఉంటే ఇంకా మంచిది.
ఒకవేళ మీరు వద్దన్నా వారు UPI (PhonePe/GPay) ద్వారా డబ్బు పంపితే, వెంటనే ఆ డబ్బును తిరిగి పంపేయండి. అలాగే వాట్సాప్ ద్వారా లేదా మెయిల్ ద్వారా “మీరు ఇల్లు ఖాళీ చేయాల్సి ఉంది, అందుకే నేను అద్దె తీసుకోవడం లేదు” అని మెసేజ్ చేయండి. ఒకవేళ అద్దెదారు లీగల్ నోటీసు ఇచ్చినా వినకపోతే, కోర్టులో ఇవన్నీ మీకు బలమైన సాక్ష్యాలుగా మారుతాయి.
యజమానుల కోసం చెక్ లిస్ట్ (Owner’s Checklist)
| చేయవలసినవి (Do’s) | చేయకూడనివి (Don’ts) |
| లీగల్ నోటీసు పంపండి | కరెంట్, నీటి సరఫరా నిలిపివేయకండి |
| గడువు ముగిశాక అద్దె తీసుకోవద్దు | బలవంతంగా సామాన్లు బయట పడేయకండి |
| రాతపూర్వకంగా కమ్యూనికేట్ చేయండి | ఇంటికి లేదా గేటుకు తాళం వేయకండి |
| కోర్టును ఆశ్రయించండి (అవసరమైతే) | అద్దెదారుపై భౌతిక దాడి చేయకండి |