“అధికారులను బెదిరించిన డాక్టర్.. అమెరికాలోని మార్చురీలో 5 గంటల తర్వాత కదలిన మృతదేహం.. అసలు ఏం జరిగింది?”

వాషింగ్టన్: అమెరికాలోని అరిజోనా రాష్ట్రంలో ఒక వింత ఘటన జరిగింది. ఇది ప్రస్తుతం సోషల్ మీడియాలో హాట్ టాపిక్‌గా మారింది. వైద్య రంగంలో నిర్లక్ష్యం అనేది సాధారణమే కావచ్చు, కానీ ఇంతటి తీవ్ర నిర్లక్ష్యం వైద్యులు ప్రదర్శిస్తారా? అని అందరూ ఆశ్చర్యపోతున్నారు. అసలు అమెరికాలో ఏం జరిగింది?

గత ఫిబ్రవరిలో, అమెరికాలోని ఒక ఇంట్లో ప్రమాదం జరిగింది. విన్సెంట్ అనే 18 నెలల చిన్నారి, ఇంటి వెనుక ఉన్న స్విమ్మింగ్ పూల్‌లో ప్రమాదవశాత్తు పడిపోయింది.

మార్చురీలో కదలిన శరీరం: తల్లిదండ్రులు వెంటనే 911కి ఫోన్ చేసి సహాయం కోరారు. వైద్య బృందం చిన్నారిని రక్షించి మెర్సీ గిల్బర్ట్ ఆసుపత్రికి తరలించారు. అక్కడ తీవ్రంగా ప్రయత్నించినప్పటికీ, చిన్నారిని రక్షించలేకపోయారు. చిన్నారి మృతి చెందినట్లు వైద్యులు ప్రకటించారు, ఇదే విషయాన్ని పోలీసు రిపోర్టులో కూడా నమోదు చేశారు. చిన్నారి మరణించిందని ప్రకటించగానే తల్లిదండ్రులు కన్నీరుమున్నీరయ్యారు. అయితే, కొన్ని క్షణాల తర్వాత చిన్నారి శరీరంలో ఏదో కదలిక ఉండటాన్ని వారు గమనించారు. అక్కడున్న ఇద్దరు పోలీసు అధికారులు కూడా చిన్నారి శ్వాస తీసుకోవడాన్ని గమనించారు.

అధికారులనే బెదిరించిన డాక్టర్: వెంటనే తల్లిదండ్రులు, ఆ ఇద్దరు పోలీసు అధికారులు కలిసి వైద్యుడికి ఈ విషయం చెప్పారు. కానీ, ఆ వైద్యుడు మాత్రం “మీ పని మీరు చూసుకోండి, నా పనిలో జోక్యం చేసుకోకండి.. నాకు చాలా పనులు ఉన్నాయి.. నేను ఊరికే మెడికల్ కాలేజీకి వెళ్లలేదు, నన్ను పని చేసుకోనివ్వండి” అని అధికారులనే బెదిరించారని సమాచారం. ఆ తర్వాత, నిబంధనల ప్రకారం చిన్నారి మృతదేహాన్ని మార్చురీకి తరలించారు.

మార్చురీలోని ఫ్రీజర్ గదిలో చిన్నారి మృతదేహాన్ని ఉంచి సుమారు 5 గంటలు గడిచింది. ఆ సమయంలో రాష్ట్ర వైద్య పరీక్షకుల బృందం (Medical Examiner’s team) మృతదేహాన్ని పరిశీలించడానికి మార్చురీకి రాగా, చనిపోయిందని ప్రకటించిన విన్సెంట్ శ్వాస తీసుకోవడాన్ని చూసి వారు షాక్‌కు గురయ్యారు.

తల్లిదండ్రులకు చిక్కులు: వెంటనే చిన్నారిని రక్షించి, హెలికాప్టర్ ద్వారా మరో పెద్ద ఆసుపత్రికి తరలించారు. అక్కడ అందించిన చికిత్సతో చిన్నారి ప్రాణాపాయం నుండి బయటపడింది, ఇప్పుడు ఆరోగ్యంగా ఉంది. ఆ తర్వాత పోలీసులు మళ్ళీ విచారణ చేపట్టారు. చిన్నారి ప్రమాదం ఎలా జరిగిందని పరిశీలిస్తే షాకింగ్ విషయాలు బయటపడ్డాయి. చిన్నారి ఇంట్లో గంజాయి వాసన రావడం, స్విమ్మింగ్ పూల్ తలుపులకు ఎటువంటి రక్షణ లేకుండా తెరిచి ఉండటం వంటి కారణాల వల్ల ఈ ప్రమాదం జరిగిందని విచారణలో వెల్లడైంది.

విచారణలో కేసు: దీంతో చిన్నారి తల్లిదండ్రులపై తీవ్ర నిర్లక్ష్యపు ఆరోపణలు మోపారు. ఈ కేసు ప్రస్తుతం కోర్టుకు చేరింది. మేరికోపా కౌంటీ అటార్నీ కార్యాలయం ఈ కేసును విచారిస్తోంది. అలాగే, ఆసుపత్రి యాజమాన్యం కూడా తమ పొరపాట్లపై అంతర్గత సమీక్ష చేస్తున్నట్లు ప్రకటించింది. మార్చురీకి వెళ్ళిన చిన్నారి ప్రాణాలతో బయటపడటం ఇప్పుడు అందరినీ ఆశ్చర్యానికి గురిచేస్తోంది.