అధిక ఛార్జీలు, అల్ప పౌర స్పృహ: ప్రారంభమైన రోజే వందే భారత్ స్లీపర్ రైలులో చెత్తాచెదారం.. వైరల్ వీడియోపై దుమారం!

భారతదేశం ఎంతో ఆసక్తిగా ఎదురుచూసిన వందే భారత్ స్లీపర్ రైలు ప్రారంభమైన కొద్ది గంటల్లోనే జాతీయ చర్చకు దారితీసింది. అయితే ఈ చర్చ దాని వేగం లేదా విలాసం గురించి కాదు, మొదటి రోజే ప్రయాణికులు వదిలివెళ్లిన చెత్తాచెదారం గురించి!

అత్యాధునిక సౌకర్యాలు, ప్రీమియం ఛార్జీలు ఉన్నప్పటికీ, రైలు బోగీల్లో ఆహార పొట్లాలు, వ్యర్థాలు నేలపై పడి ఉన్న వీడియోలు సామాజిక మాధ్యమాల్లో వైరల్ అయ్యాయి. ప్రయాణికులలో “పౌర స్పృహ” (Civic Sense) లోపించడంపై నెటిజన్లు తీవ్ర ఆగ్రహం వ్యక్తం చేస్తున్నారు.

ప్రధాని నరేంద్ర మోదీ ప్రారంభించిన హౌరా-కామాఖ్య (గువహటి) సర్వీసు తొలి ప్రయాణంలోనే ఈ ఘటన జరిగింది. రూ. 2,000 కంటే ఎక్కువ ధర కలిగిన టికెట్ కొని, విలాసవంతమైన ఇంటీరియర్స్ ఉన్న రైలును ఇంత త్వరగా మురికిగా మార్చడం చూసి.. “భారతదేశ మౌలిక సదుపాయాలు అభివృద్ధి చెందుతున్నంత వేగంగా పౌరుల అలవాట్లు మారడం లేదా?” అనే ప్రశ్నలు తలెత్తుతున్నాయి.

జపాన్ తరహా క్రమశిక్షణ కావాలి: నెటిజన్లు ఈ విషయాన్ని తీవ్రంగా ఖండించారు. ఒక యూజర్ స్పందిస్తూ.. “మన ప్రస్తుత తరంపై మనం దృష్టి పెట్టకపోతే ఇది ఇలాగే కొనసాగుతుంది. జపాన్ తరహా విద్యా విధానాన్ని చిన్నప్పటి నుండే ప్రవేశపెట్టాలి. అక్కడ పిల్లలు భోజనం చేశాక తమ డెస్క్‌లను తామే శుభ్రం చేసుకుంటారు. స్కూళ్లలో దీనిని తప్పనిసరి చేయాలి. తల్లిదండ్రులే పౌర స్పృహ లేకుండా ప్రవర్తిస్తున్నప్పుడు వారు పిల్లలకు ఏమి నేర్పుతారు?” అని ఆవేదన వ్యక్తం చేశారు.

మరికొందరు స్పందిస్తూ.. “ఇది వందే భారత్ స్లీపర్ రైలు, చెత్త బుట్ట కాదు! ఇలాంటి ఆధునిక వస్తువులను కొందరు ‘గవార్’ (అనాగరికులు) కబాడీ షాపులుగా మారుస్తున్నారు. సిగ్గుపడాలి!” అని ఘాటుగా వ్యాఖ్యానించారు.

కఠిన చర్యలు తీసుకోవాలి: ఈ వివాదం ఇప్పుడు కఠిన నిబంధనల వైపు మళ్లింది. సీసీటీవీ ఫుటేజ్ మరియు పిఎన్ఆర్ (PNR) డేటా ఆధారంగా చెత్త వేసే ప్రయాణికులను గుర్తించి భారీ జరిమానాలు విధించాలని రైల్వే శాఖను కోరుతున్నారు. ఇలాంటి వారిని భవిష్యత్తులో ప్రీమియం రైళ్లలో ప్రయాణించకుండా ‘నో-ఫ్లై లిస్ట్’ లాంటి జాబితాలో చేర్చాలని సూచనలు వస్తున్నాయి.

వందే భారత్ స్లీపర్ సర్వీసు వివరాలు: ఈ వివాదం పక్కన పెడితే, భారతీయ రైల్వేలో ఇది ఒక సాంకేతిక మైలురాయి.

• బోగీలు: మొత్తం 16 కోచ్‌లు (11 ఏసీ-3 టైర్, 4 ఏసీ-2 టైర్, 1 ఫస్ట్ ఏసీ).
• సామర్థ్యం: 823 మంది ప్రయాణికులు.
• వేగం: హౌరా నుండి కామాఖ్యకు 14 గంటల్లో చేరుకుంటుంది.
• ధరలు: ఏసీ-3 (₹2,299), ఏసీ-2 (₹2,970), ఫస్ట్ ఏసీ (₹3,640).