ముంబై: దేశ ఆర్థిక రాజధాని ముంబైలోని ధారావి ప్రాంతంలో చోటుచేసుకున్న ఒక ఘటన నగరాన్ని దిగ్భ్రాంతికి గురిచేసింది. కేవలం స్కూటర్ పార్కింగ్ విషయంలో తలెత్తిన చిన్నపాటి వివాదం ఎంతటి ఘోరానికి దారితీసిందంటే.. ఒక యువకుడు తన 22 ఏళ్ల స్నేహితుడు అశ్విన్ నాడార్‌ను అందరూ చూస్తుండగానే కొట్టి చంపాడు.
ఈ దారుణానికి సంబంధించిన అత్యంత కలచివేసే వీడియో ఒకటి బయటకు వచ్చింది. ఇది నగరంలో శాంతిభద్రతలు మరియు మానవత్వపు విలువలపై అనేక ప్రశ్నలను లేవనెత్తుతోంది. పోలీసులు ప్రధాన నిందితుడు ఆషిక్ ఖాన్‌ను అరెస్ట్ చేశారు. కోర్టు అతనికి మార్చి 24 వరకు పోలీస్ కస్టడీ విధించింది. పోలీసుల సమాచారం ప్రకారం, మార్చి 16న పార్కింగ్ స్థలంలో వీరిద్దరి మధ్య మొదలైన వాగ్వాదం ఈ హత్యకు దారితీసింది.
మెడలో తాడు వేసి ఈడ్చుకెళ్లి.. కొరడాతో కొట్టి.. సోషల్ మీడియాలో వైరల్ అవుతున్న వీడియో ఒళ్లు గగుర్పొడిచేలా ఉంది. నిందితుడు ఆషిక్ ఖాన్ క్రూరత్వానికి అన్ని హద్దులు దాటేశాడని వీడియోలో స్పష్టంగా కనిపిస్తోంది. అతను అశ్విన్ మెడలో తాడు (హంటర్) వేసి నేలపై ఈడ్చుకెళ్తూ, నిర్దాక్షిణ్యంగా కొరడాతో బాదాడు. అశ్విన్ తల నుండి కాళ్ల వరకు రక్తంతో తడిసిపోయి, చేతులు జోడించి ‘భాయ్-భాయ్’ అని ప్రాధేయపడ్డాడు. తన ప్రాణాలు వదలమని వేడుకున్నా ఆషిక్ మనసు కరగలేదు.
అక్కడున్న మరికొందరు నిందితుడిని ఆపడానికి బదులు అతనికి సహకరించడం విచారకరం. తీవ్రంగా గాయపడిన అశ్విన్‌ను వెంటనే సైన్ ఆసుపత్రికి తరలించగా, అప్పటికే అతను మరణించినట్లు వైద్యులు ధృవీకరించారు.
మూగప్రేక్షకులుగా జనం.. రహస్యంగా తీసిన వీడియో ఈ ఘోరమైన హత్యను ఎవరో పైనుండి రహస్యంగా వీడియో తీశారు. దారి వెంట వెళ్లే వారు ఎవరైనా ఆపడానికి ప్రయత్నిస్తే, నిందితుడితో ఉన్న గుంపు “ఇక్కడ ఏం చూస్తున్నారు, వెళ్ళండి” అంటూ వారిని బెదిరించి పంపేసింది. అశ్విన్ నేలపై పడి కొట్టుకుంటున్నా ఎవరూ కాపాడే ధైర్యం చేయలేదు. ఈ వీడియో ఆధారంగా నిందితుడికి సహకరించిన ఇతరులను కూడా గుర్తించే పనిలో ముంబై పోలీసులు ఉన్నారు.