తమిళనాడు అసెంబ్లీ ఎన్నికల నేపథ్యంలో అఖిల భారత అన్నా ద్రావిడ మున్నేట్ర కజగం (AIADMK) ఇప్పటికే 297 వాగ్దానాలను ప్రకటించగా, ఇప్పుడు ప్రజలను ఆకట్టుకునేలా మరిన్ని అదనపు కీలక హామీలను విడుదల చేసింది.
ప్రధాన హామీలు ఇవే:
- యువతకు వాహన సబ్సిడీ: ఉద్యోగాలకు వెళ్లే 10 లక్షల మంది యువతకు ‘అమ్మ ద్విచక్ర వాహన పథకం’ కింద కొత్త వాహనం కొనుగోలు చేయడానికి రూ. 10,000 సబ్సిడీ అందజేస్తామని ప్రకటించారు.
- పోటీ పరీక్షల శిక్షణ: కళాశాల విద్య పూర్తి చేసిన విద్యార్థులు పోటీ పరీక్షలకు సిద్ధమయ్యేలా తాలూకా స్థాయిలో ప్రత్యేక కోచింగ్ మరియు కౌన్సెలింగ్ కేంద్రాలను ఏర్పాటు చేస్తారు.
- చిరు వ్యాపారాలకు చేయూత: యువతీ యువకులు చిన్న, సూక్ష్మ పరిశ్రమలు ప్రారంభించేందుకు దరఖాస్తు చేసుకుంటే.. 30 రోజుల్లోనే ‘సింగిల్ విండో’ విధానం ద్వారా లైసెన్స్లు జారీ చేస్తారు. దీని కోసం ఇచ్చే సబ్సిడీని 25% నుండి 35% కి పెంచుతారు.
- మహిళల భద్రత: మహిళలకు వ్యతిరేకంగా జరిగే నేరాలను అరికట్టేందుకు అన్ని జిల్లా కేంద్రాల్లో 24 గంటల పాటు పనిచేసే ‘వార్ రూమ్’లను ఏర్పాటు చేస్తారు.
- కేబుల్ బిల్లు తగ్గింపు: సామాన్య ప్రజలకు ఊరటనిస్తూ కేబుల్ టీవీ ఛార్జీలను 50% వరకు తగ్గిస్తామని హామీ ఇచ్చారు.
- కార్మికులకు భారీ పరిహారం: భవన నిర్మాణ కార్మికులు పనిలో ఉండగా మరణిస్తే వారి కుటుంబానికి రూ. 25 లక్షలు, తాటి చెట్టు పైనుండి పడి మరణించే గీత కార్మికుల కుటుంబాలకు రూ. 20 లక్షల చొప్పున పరిహారం అందజేస్తామని ఏఐఏడీఎంకే వాగ్దానం చేసింది.
- ప్రాంతీయ హామీలు: కృష్ణగిరి జిల్లా సంప్రదాయ ‘అత్తుకట్టు’ పండుగను నిరంతరం నిర్వహించేలా జీవో జారీ చేస్తామని, మామిడి పండ్లకు మద్దతు ధర నిర్ణయిస్తామని హామీ ఇచ్చారు. అలాగే కడలూరు, విలుప్పురం జిల్లాల్లో జీడిపప్పు పరిశ్రమలో పనిచేసే మహిళలకు ఉచితంగా చిన్నపాటి చేతి పనిముట్లను పంపిణీ చేస్తారు.
ఎన్నికల రణం ముదురుతున్న వేళ, ఏఐఏడీఎంకే విడుదల చేసిన ఈ అదనపు హామీలు వివిధ వర్గాల ప్రజల్లో భారీ అంచనాలను పెంచాయి.