మధ్యప్రాచ్యంలో కొనసాగుతున్న యుద్ధం కారణంగా ఎల్‌ఎన్‌జీ (LNG) సరఫరా తీవ్రంగా దెబ్బతింది. దీనివల్ల భారతదేశంలో సహజ వాయువు (Natural Gas) లభ్యతపై ఒత్తిడి పెరుగుతోంది. ఈ పరిస్థితిని సమీక్షించిన భారత ప్రభుత్వం, నిత్యావసర వస్తువుల చట్టం, 1955 (Essential Commodities Act, 1955) లోని సెక్షన్ 3 కింద ఒక కీలక ఉత్తర్వు జారీ చేసింది.
‘పెట్రోలియం మరియు సహజ వాయువు (సమాచార సమర్పణ) ఆర్డర్, 2026’ ప్రకారం.. దేశంలోని ప్రభుత్వ మరియు ప్రైవేట్ చమురు, గ్యాస్ కంపెనీలన్నీ తమ వద్ద ఉన్న డేటాను తప్పనిసరిగా పెట్రోలియం ప్లానింగ్ అండ్ అనాలిసిస్ సెల్ (PPAC) కు సమర్పించాలని ప్రభుత్వం ఆదేశించింది.
ప్రభుత్వ సంస్థల నుండి ప్రైవేట్ కంపెనీల వరకు..
ఈ ఆదేశం ప్రకారం, ఏ కంపెనీ కూడా తమ వ్యాపార రహస్యాల పేరుతో సమాచారాన్ని దాచడానికి వీల్లేదు. ప్రభుత్వ రంగ సంస్థలైన ONGC, GAIL, IOC, BPCL, HPCL లతో పాటు ప్రైవేట్ దిగ్గజాలైన రిలయన్స్, అదానీ గ్యాస్ మరియు ప్రతి చిన్న, పెద్ద కంపెనీ ఈ నిబంధన పరిధిలోకి వస్తాయి. ప్రతి కంపెనీ తమ లావాదేవీల పూర్తి లెక్కలను ప్రభుత్వానికి అప్పగించాల్సి ఉంటుంది.
ఎలాంటి సమాచారం ఇవ్వాలి?
కంపెనీలు ఈ క్రింది వివరాలను ప్రభుత్వానికి తెలపాలి:
- ఉత్పత్తి మరియు నిల్వ: ఎంత చమురు లేదా గ్యాస్ ఉత్పత్తి అవుతోంది? ప్రస్తుతం ఎంత నిల్వ (Stock) ఉంది?
- ఎగుమతి మరియు దిగుమతి: విదేశాల నుండి ఎంత తెప్పిస్తున్నారు? బయట దేశాలకు ఎంత పంపుతున్నారు?
- సరఫరా మరియు రవాణా: గ్యాస్ పైప్‌లైన్ల ద్వారా ఎక్కడికి సరఫరా చేస్తున్నారు? మార్కెట్‌కు ఎంత చేరుతోంది?
- వినియోగం: అసలు ఎంత గ్యాస్ లేదా చమురు వాడకంలో ఉంది?
ప్రభుత్వం ఇంత పెద్ద నిర్ణయం ఎందుకు తీసుకుంది?
ఖతార్‌లోని రాస్ లఫాన్ (Ras Laffan) పై జరిగిన దాడి తర్వాత ప్రపంచ ఎల్‌ఎన్‌జీ సరఫరాలో 20 శాతం అంతరాయం కలిగింది. హోర్ముజ్ జలసంధి (Strait of Hormuz) మూతపడటంతో భారత చమురు నౌకల రాకపోకలు కష్టతరమయ్యాయి. ఇలాంటి సమయంలో దేశంలో అసలు ఎంత స్టాక్ ఉందో తెలుసుకోవడం ప్రభుత్వానికి చాలా ముఖ్యం. ఒకవేళ రాబోయే రోజుల్లో గ్యాస్ కొరత ఏర్పడితే, ఎక్కడ రేషనింగ్ (సరఫరా నియంత్రణ) చేయాలి మరియు ఎక్కడ అత్యవసరంగా సరఫరా పెంచాలి అనే విషయాల్లో ప్రభుత్వం త్వరితగతిన నిర్ణయాలు తీసుకోవడానికి ఈ రియల్ టైమ్ డేటా ఉపయోగపడుతుంది.