టెహ్రాన్: పశ్చిమ ఆసియాలో జరుగుతున్న యుద్ధం కారణంగా సముద్ర రవాణాలో ఉద్రిక్తతలు పెరిగాయి. ముందస్తు అనుమతి లేకుండా హోర్ముజ్ జలసంధి గుండా వెళ్లడానికి ప్రయత్నించిన పాకిస్థాన్ కంటైనర్ నౌకను ఇరాన్ నౌకాదళం అడ్డుకుని వెనక్కి పంపడం కలకలం సృష్టించింది.
అయితే, ఈ ఘటన జరిగిన మరుసటి రోజే ఇరాన్ ఒక కీలక నిర్ణయం తీసుకుంది. హోర్ముజ్ జలసంధి గుండా భారత్, పాకిస్థాన్‌తో సహా కేవలం ఐదు దేశాలకు మాత్రమే ప్రయాణించేందుకు ఇరాన్ అనుమతి ఇచ్చింది.
అమెరికా-ఇజ్రాయెల్ ఉమ్మడి దళాలు మరియు ఇరాన్ మధ్య ఘర్షణలు మూడు వారాలు దాటినా కొనసాగుతూనే ఉన్నాయి. ఈ యుద్ధ ప్రభావం కేవలం భూమిపైనే కాకుండా సముద్ర మార్గాలపై కూడా తీవ్రంగా పడింది. ముఖ్యంగా ప్రపంచ వాణిజ్యానికి అత్యంత కీలకమైన హోర్ముజ్ జలసంధి ప్రాంతంలో ఇరాన్ కఠినమైన ఆంక్షలు విధించింది. యుద్ధ పరిస్థితుల దృష్ట్యా, ఈ మార్గం గుండా వెళ్లే సరుకు రవాణా నౌకలు ముందస్తు అనుమతి తీసుకోవడం తప్పనిసరి చేసింది.
ఇరాన్ – ఇజ్రాయెల్ యుద్ధం
భారత్ వంటి కొన్ని దేశాలు జరిపిన చర్చల ఆధారంగా, కొన్ని నౌకలకు మాత్రమే ప్రత్యేక అనుమతి లభించినట్లు సమాచారం. ఈ క్రమంలో, అనుమతి లేకుండా పాకిస్థాన్ వైపు వెళ్తున్న ‘సెలన్’ అనే కంటైనర్ నౌక హోర్ముజ్ జలసంధిలోకి ప్రవేశించడానికి ప్రయత్నించింది. దీనిని గమనించిన ఇరాన్ నౌకాదళం వెంటనే ఆ నౌకను అడ్డుకుని, వెనక్కి పంపినట్లు అధికారిక సమాచారం వెలువడింది.
హోర్ముజ్ జలసంధి
ఈ విషయంపై ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) నావికాదళ కమాండర్ అలిరెజా తాంగ్‌సిరి మాట్లాడుతూ.. చట్టపరమైన నిబంధనలను పాటించకుండా, అనుమతి లేకుండా ఆ నౌక ప్రవేశించడానికి ప్రయత్నించిందని, అందుకే వెనక్కి పంపామని తెలిపారు. ఈ ఇరుకైన సముద్ర మార్గంలో ప్రయాణించే అన్ని నౌకలు ఇరాన్ సముద్ర యంత్రాంగంతో సమన్వయం చేసుకోవాలని, ఇది దేశ సార్వభౌమాధికారాన్ని కాపాడే చర్య అని ఆయన స్పష్టం చేశారు.
ముడి చమురు
ప్రపంచ ముడి చమురు సరఫరాలో హోర్ముజ్ జలసంధి కీలక పాత్ర పోషిస్తుంది. ప్రపంచవ్యాప్తంగా వినియోగించే ముడి చమురులో ఐదో వంతు ఈ మార్గం ద్వారానే రవాణా అవుతుంది. అందుకే, ఇక్కడ ఏర్పడే ఏ చిన్న అడ్డంకి అయినా ప్రపంచ ఇంధన మార్కెట్‌పై ప్రత్యక్ష ప్రభావాన్ని చూపుతుంది. తన మిత్ర దేశాల నౌకలైనా సరే, భద్రతా నిబంధనలు పాటిస్తేనే అనుమతిస్తామని ఇరాన్ హెచ్చరించింది.
భారత్ నౌకలకు అనుమతి
అయితే, ఈ వ్యవహారంలో ఒక ఆసక్తికరమైన మలుపు చోటుచేసుకుంది. హోర్ముజ్ జలసంధి గుండా ప్రయాణించడానికి భారత్, పాకిస్థాన్‌లతో సహా కేవలం 5 దేశాలకు మాత్రమే ఇరాన్ అనుమతి ఇచ్చింది. దీనిపై ఇరాన్ విదేశాంగ మంత్రి సయ్యద్ అబ్బాస్ అరాక్చీ మాట్లాడుతూ.. “మేము మిత్రదేశాలుగా భావించే కొన్ని దేశాల నౌకలకు మాత్రమే హోర్ముజ్ జలసంధి గుండా వెళ్లేందుకు అనుమతి ఇచ్చాము. చైనా, రష్యా, భారత్, ఇరాక్ మరియు పాకిస్థాన్ దేశాల నౌకలు ఈ మార్గంలో ప్రయాణించవచ్చు” అని తెలిపారు. నిన్న అనుమతి నిరాకరించి, నేడు అనుమతి ఇవ్వడం చర్చనీయాంశంగా మారింది.