బంగారం స్మగ్లింగ్ కోసం కొందరు వింతైన పద్ధతులను అవలంబిస్తున్నారు. అహ్మదాబాద్ కస్టమ్స్ ఎయిర్ ఇంటెలిజెన్స్ యూనిట్ (AIU) శనివారం ఒక భారీ స్మగ్లింగ్ ప్రయత్నాన్ని అడ్డుకుంది. అబుధాబి నుండి వచ్చిన ఒక ప్రయాణికుడు తన కడుపులో బంగారం దాచుకుని రాగా అధికారులు పట్టుకున్నారు.
ఘటన వివరాలు: ఫిబ్రవరి 19న అబుధాబి నుండి ఎయిర్ అరేబియా విమానంలో అహ్మదాబాద్ చేరుకున్న షారూఖ్ అనే ప్రయాణికుడిపై కస్టమ్స్ అధికారులకు అనుమానం కలిగింది. అతని ప్రవర్తనను గమనించిన అధికారులు క్షుణ్ణంగా తనిఖీ చేయగా, అతను లోహపు వస్తువులను మింగినట్లు అంగీకరించాడు.
ఆసుపత్రిలో గుర్తింపు: వెంటనే అతడిని అహ్మదాబాద్‌లోని సివిల్ ఆసుపత్రికి తరలించారు. వైద్యుల పర్యవేక్షణలో అతని విసర్జన (Stool) ప్రక్రియ ద్వారా మూడు సిలిండర్ ఆకారపు క్యాప్సూల్స్ మరియు ఒక స్టీల్ బాల్‌ను వెలికితీశారు. ఆ మూడు క్యాప్సూల్స్‌లో 24 క్యారెట్ల స్వచ్ఛత కలిగిన 135.200 గ్రాముల బంగారం ఉన్నట్లు నిర్ధారించారు. దీని మార్కెట్ విలువ సుమారు రూ. 21.89 లక్షలుగా తేలింది. ఇక ఆ నాలుగో వస్తువు ఇనుముతో చేసిన స్టీల్ బాల్‌గా గుర్తించారు. దీనిపై కస్టమ్స్ అధికారులు తదుపరి విచారణ జరుపుతున్నారు.