ఉత్తరప్రదేశ్‌లోని కాన్పూర్, నౌబస్తా ప్రాంతంలో ఇద్దరు యువతుల మధ్య జరిగిన గొడవకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. రాత్రిపూట పోలీసులు పహారా ఉండే ప్రాంతంలోనే ఈ ఘటన జరిగింది. దురదృష్టవశాత్తూ గొడవ జరుగుతున్న సమయంలో అక్కడ పోలీసులు ఎవరూ లేకపోవడం, సమీపంలోనే పోలీస్ చౌకీ ఉన్నప్పటికీ వారికి ఈ విషయం తెలియకపోవడం గమనార్హం.
అసలేం జరిగిందంటే? యశోదా నగర్ బైపాస్ వద్ద ఈ గొడవ జరిగింది. వైరల్ వీడియోలో తెల్లటి దుస్తులు ధరించిన ఒక యువతి మరో యువతిపై విరుచుకుపడటం కనిపిస్తుంది. దాడి చేసిన యువతి బాధితురాలిని కిందకు పడేసి, జుట్టు పట్టుకుని ఈడ్చుకుంటూ వెళ్ళి వరుసగా 11 చెంపదెబ్బలు కొట్టింది. అంతేకాకుండా కిందపడిపోయిన యువతి ఛాతీపై, తలపై కాళ్లతో తన్నుతూ కిరాతకంగా ప్రవర్తించింది.
గొడవకు కారణం ఏంటి? వీడియోలో వినిపిస్తున్న మాటల ప్రకారం.. ఈ గొడవ అంతా ‘అభిషేక్’ అనే యువకుడి కోసమేనని స్పష్టమవుతోంది. దాడి చేసిన యువతి గట్టిగా అరుస్తూ.. “నువ్వు అభిషేక్‌ను వదిలేశావు.. ఇప్పుడు వాడు నావాడు అయ్యాడు. మరి నువ్వు వాడిని ‘బాబు’ అని ఎందుకు పిలుస్తున్నావు? స్కై లాన్ (Sky Lawn) దగ్గర కలవాలని వాడికి ఎందుకు మెసేజ్ చేస్తున్నావు?” అంటూ ఆగ్రహం వ్యక్తం చేసింది.
పోలీసుల స్పందన: కాన్పూర్‌లో ఇటీవల కాలంలో ఇలాంటి గొడవలు ఎక్కువవుతుండటంతో పోలీసులు ఈ విషయాన్ని తీవ్రంగా పరిగణించారు. “వైరల్ వీడియో మా దృష్టికి వచ్చింది. ఇది ‘లవ్ ట్రయాంగిల్’ (ప్రేమ త్రికోణం) కారణంగా జరిగిన గొడవగా ప్రాథమికంగా అర్థమవుతోంది. ఇద్దరు యువతులను గుర్తించడానికి ప్రయత్నిస్తున్నాం. త్వరలోనే వారిపై చట్టపరమైన చర్యలు తీసుకుంటాం” అని పోలీసులు తెలిపారు.