ఇరాన్‌ను మళ్ళీ ఒక గొప్ప దేశంగా మారుస్తానని అమెరికా అధ్యక్షుడు డొనాల్డ్ ట్రంప్ ప్రకటిస్తున్నారు. ఇరాన్‌లో ఆందోళన చేస్తున్న ప్రజలపై హింస జరిగితే, ఆ దేశంపై కఠిన చర్యలు తీసుకుంటామని ఆయన హెచ్చరించారు. అయితే, “మీ సొంత వ్యవహారాలు మీరు చూసుకోండి” అని ఇరాన్ సుప్రీం లీడర్ ఖమేనీ ధీటుగా సమాధానమిచ్చారు.
ట్రంప్ పన్నుల అస్త్రం: ఇరాన్‌ను ఆర్థికంగా దెబ్బతీయడానికి ట్రంప్ ఒక కీలక నిర్ణయం తీసుకున్నారు. ఇరాన్‌తో వాణిజ్యం చేస్తూ, అదే సమయంలో అమెరికాతో కూడా వ్యాపారం చేసే దేశాలపై 25 శాతం అదనపు పన్ను విధిస్తున్నట్లు ప్రకటించారు. ఇది తక్షణమే అమలులోకి వస్తుందని, ఈ నిర్ణయంలో మార్పు ఉండదని స్పష్టం చేశారు. దీనిపై చైనా ఇప్పటికే తన తీవ్ర నిరసనను వ్యక్తం చేసింది.
రష్యా స్పందన: ఇరాన్‌పై సైనిక చర్య తీసుకుంటామన్న అమెరికా హెచ్చరికలపై రష్యా విదేశాంగ శాఖ స్పందించింది. “మధ్యప్రాచ్యంలో ప్రస్తుత పరిస్థితిని మరియు అంతర్జాతీయ భద్రతను అమెరికా దృష్టిలో ఉంచుకోవాలి. ఇరాన్‌పై కొత్తగా సైనిక దాడులు చేస్తామని బెదిరించడం ఆమోదయోగ్యం కాదు. ఇరాన్ అంతర్గత రాజకీయాల్లో విదేశీ జోక్యం ఉండకూడదు” అని రష్యా ఖండించింది. ఇరాన్‌పై దాడి చేస్తే సంభవించే విపత్కర పరిణామాల గురించి అమెరికా తెలుసుకోవాలని హెచ్చరించింది.
ఇరాన్ ధీటైన బదులు: ఇరాన్‌లో జరుగుతున్న ఆందోళనకారులకు మద్దతుగా “మీరు పోరాటాన్ని కొనసాగించండి, మీకు సహాయం అందుతోంది” అని ట్రంప్ హామీ ఇచ్చారు. దీనిపై ఇరాన్ రక్షణ మంత్రి అజీజ్ నసీర్‌జాదే స్పందిస్తూ.. “మాపై జరిగే ఏ రకమైన దాడికైనా మేము గట్టిగా సమాధానం ఇస్తాం. మమ్మల్ని ఎవరూ బెదిరించడానికి అనుమతించం. ఈ ప్రాంతంలోని అమెరికా సైనిక స్థావరాలన్నింటిపై మేము దాడులు చేస్తాం” అని హెచ్చరించారు.