వాషింగ్టన్: 2026 ఫిఫా ప్రపంచకప్ ఫుట్బాల్ టోర్నమెంట్లో, 1998 తర్వాత తొలిసారిగా అర్హత సాధించి నార్వే జట్టు అదరగొడుతోంది. ఇప్పటివరకు ఆడిన రెండు మ్యాచ్ల్లోనూ విజయం సాధించి మెప్పించింది. మైదానంలో ఆ జట్టు చూపిస్తున్న దూకుడు ఒకెత్తయితే.. సోషల్ మీడియాలో ఆ జట్టు తినే ఆహారం గురించి ప్రచారంలో ఉన్న ఒక వార్త అంతర్జాతీయంగా పెద్ద చర్చకు దారితీసింది.
అమెరికా, కెనడా, మెక్సికో దేశాలు సంయుక్తంగా నిర్వహిస్తున్న ఈ ప్రపంచకప్ టోర్నీ కోసం.. నార్వే జట్టు అమెరికాలోని స్థానిక ఆహారాన్ని నమ్మకుండా, తమ దేశం నుంచే ఏకంగా 1,000 కిలోల ఆహారాన్ని, నారింజ పండ్లను విమానంలో తెచ్చుకుందంటూ నెటిజన్లు రకరకాలుగా ట్రోల్ చేయడం ప్రారంభించారు. ఇది నార్వే ‘ఫుట్బాల్’ (Football) టీమా లేక ‘ఫుడ్బాల్’ (Food ball) టీమా? అంటూ కామెంట్లు పెట్టారు.
స్పష్టం చేసిన నార్వే టీమ్ హెడ్ షెఫ్:
ఈ వివాదంపై నార్వే జట్టు ప్రధాన షెఫ్ (Chief Chef) అధికారికంగా వివరణ ఇస్తూ.. తమ జట్టుపై వస్తున్న వార్తలు పూర్తిగా అవాస్తవమని పేర్కొన్నారు. తాము తెచ్చింది 1,000 కిలోలు కాదని, కేవలం 580 కిలోల ప్రత్యేక ఆహార పదార్థాలు మాత్రమేనని ఆయన స్పష్టం చేశారు.
నార్వే నుండి తెచ్చిన ఆహార పదార్థాల వివరాలు:
సాల్మన్ (Salmon) & ట్రౌట్ (Trout) చేపలు: 300 కిలోలు
హాలిబట్ (Halibut) చేపలు: 100 కిలోలు
నార్వే సాంప్రదాయ బ్రౌన్ చీజ్ (Brown Cheese): 80 కిలోలు
జార్ల్స్బర్గ్ చీజ్ (Jarlsberg Cheese): 100 కిలోలు
నెటిజన్లు ప్రచారం చేస్తున్నట్లు నారింజ పండ్లను తాము నార్వే నుండి తీసుకురాలేదని, అమెరికాలోనే స్థానికంగా కొనుగోలు చేసి ప్రతిరోజూ జ్యూస్ రూపంలో ఆటగాళ్లకు అందిస్తున్నామని ఆయన తెలిపారు.
సొంత దేశ ఆహారం ఎందుకు ముఖ్యం?
“ప్రపంచకప్ వంటి ప్రతిష్టాత్మక టోర్నమెంట్లలో ఆడేటప్పుడు ఆటగాళ్లకు అలవాటైన రుచులు, స్థిరమైన డైట్ చాలా ముఖ్యం. నిర్దిష్టమైన ఆహార అలవాట్లు ఉన్న క్రీడాకారులకు తెలిసిన రుచులను అందించడం వారి పోషకాహార స్థాయిలకే కాకుండా, మానసిక ప్రశాంతతకు (Mental Well-being) ఎంతగానో సహాయపడుతుంది. ఇందుకోసమే నార్వేకు చెందిన కొన్ని ప్రత్యేక ఉత్పత్తులను మాత్రమే ఇక్కడికి తీసుకొచ్చాం” అని షెఫ్ వివరించారు.
అలాగే, అమెరికాలోని నాణ్యమైన స్థానిక ఉత్పత్తులను, తమ దేశ సాంప్రదాయ పదార్థాలను మేళవించి, ఆటగాళ్లకు ఇంట్లో తింటున్న అనుభూతిని కలిగించేలా వంటలు చేస్తున్నట్లు ఆయన పేర్కొన్నారు.
క్రీడా ప్రపంచంలో ఇది సాధారణమే:
అంతర్జాతీయ క్రీడాకారులు ఇతర దేశాల పర్యటనలకు వెళ్లేటప్పుడు తమకు అలవాటైన ఆహార పదార్థాలను తీసుకెళ్లడం కొత్తేమీ కాదు. గతంలో భారత క్రికెట్ దిగ్గజాలు రాహుల్ ద్రావిడ్, వీవీఎస్ లక్ష్మణ్ తదితరులు ఆస్ట్రేలియా పర్యటనకు వెళ్లినప్పుడు భారతీయ కాఫీ ప్యాకెట్లను తీసుకెళ్లేవారు. అదేవిధంగా, ఆస్ట్రేలియా జట్టు భారతదేశంలో పర్యటించేటప్పుడు కొందరు ఆసీస్ ఆటగాళ్లు తమతో పాటు ప్రత్యేక కాఫీ మిషన్లను తెచ్చుకోవడం క్రీడా రంగంలో పరిపాటిగా వస్తోంది.