అమెరికా – ఇరాన్ శాంతి చర్చల ఒప్పందంలో ప్రస్తుతం ఇజ్రాయెల్ అతిపెద్ద సమస్యగా మారింది. ఈ యుద్ధంలో ఇరాన్ యొక్క సైనిక శక్తిని పూర్తిగా అణచివేయాలని, అదే సమయంలో లెబనాన్లో ఇరాన్ మద్దతుతో పనిచేస్తున్న ‘హిజ్బుల్లా’ సంస్థను పూర్తిగా తుడిచిపెట్టాలని ఇజ్రాయెల్ భావిస్తోంది.
దీనికోసమే లెబనాన్ రాజధాని బీరూట్ (Beirut) వరకు ఇజ్రాయెల్ దాడులు చేస్తూ వస్తోంది. అయితే, అమెరికా-ఇరాన్ శాంతి చర్చల వల్ల తన లక్ష్యాలు నెరవేరవని భావిస్తున్న ఇజ్రాయెల్.. ఈ ఒప్పందానికి నిరంతరం అడ్డుతగులుతోంది.
‘లెబనాన్ డీకాన్ఫ్లిక్షన్ సెల్’ ఏర్పాటు:
జెనీవాలో ఇరు దేశాల (అమెరికా-ఇరాన్) మధ్య జరిగిన 12 గంటల సుదీర్ఘ సమావేశం ముగింపులో.. ఇజ్రాయెల్ దళాలు దక్షిణ లెబనాన్ నుండి పూర్తిగా వైదొలగాలనే ప్రధాన లక్ష్యంతో ‘లెబనాన్ డీకాన్ఫ్లిక్షన్ సెల్’ (Lebanon Deconfliction Cell) ఏర్పాటు చేయబడింది.
అయితే, దీనికి గట్టి కౌంటర్ ఇస్తూ ఇజ్రాయెల్ ప్రధాని బెెంజమిన్ నెతన్యాహు సంచలన ప్రకటన చేశారు. దక్షిణ లెబనాన్ నుండి ఇజ్రాయెల్ సైన్యం వెనక్కి తగ్గేదే లేదని ఆయన తెగేసి చెప్పారు. ఈ ప్రకటన అమెరికా – ఇరాన్ మధ్య కుదిరిన 60 రోజుల తాత్కాలిక శాంతి ఒప్పంద ప్రక్రియను తీవ్రంగా దెబ్బతీసే పరిస్థితిని తెచ్చిపెట్టింది.
అవసరమైనంత కాలం ఉంటాం – నెతన్యాహు:
ఇజ్రాయెల్ ప్రధాని బెెంజమిన్ నెతన్యాహు మాట్లాడుతూ.. దక్షిణ లెబనాన్లోని ‘బఫర్ జోన్’ (Buffer Zone) లో తమ సైన్యం అవసరమైనంత కాలం ఉంటుందని స్పష్టం చేశారు. ఉత్తర సరిహద్దు ప్రాంతంలో నివసిస్తున్న ఇజ్రాయెల్ ప్రజలను, దేశంలోని పౌరులందరినీ రక్షించడం కోసమే ఈ నిర్ణయం తీసుకున్నట్లు ఆయన పేర్కొన్నారు.
అంతేకాకుండా, ఇరాన్ను ఎట్టిపరిస్థితుల్లోనూ అణ్వాయుధాలు (న్యూక్లియర్ వెపన్స్) తయారు చేయనివ్వబోమని, దాన్ని అడ్డుకోవడానికి అవసరమైన అన్ని చర్యలూ తీసుకుంటామని నెతన్యాహు స్పష్టం చేశారు.
602 చదరపు కిలోమీటర్ల రక్షణ వలయం:
ఇజ్రాయెల్ ఏర్పాటు చేసిన ఈ రక్షణ వలయం (బఫర్ జోన్) సుమారు 602 చదరపు కిలోమీటర్ల (230 చదరపు మైళ్లు) విస్తీర్ణంలో ఉంది. ఇది లెబనాన్ దేశపు మొత్తం భూభాగంలో దాదాపు 6 శాతానికి సమానం.
ఈ ప్రాంతాన్ని తమ ఆధీనంలో ఉంచుకోవడం ద్వారా.. ఇరాన్ మద్దతు గల దళాలు ఇజ్రాయెల్ ఉత్తర సరిహద్దు వైపు దూసుకురాకుండా అడ్డుకోవచ్చని ఇజ్రాయెల్ రక్షణ శాఖ వర్గాలు వివరణ ఇస్తున్నాయి.
శాంతి ఒప్పందానికి పెను సవాల్:
దక్షిణ లెబనాన్ నుండి ఇజ్రాయెల్ పూర్తిగా తప్పుకోవాలని ఇరాన్ పట్టుబడుతున్న తరుణంలో.. నెతన్యాహు తీసుకున్న ఈ నిర్ణయం అమెరికా – ఇరాన్ మధ్య కుదిరిన 60 రోజుల రోడ్మ్యాప్ అమలు కాకముందే దానికి బ్రేకులు వేస్తుందా? అనే ప్రశ్నలను లేవనెత్తుతోంది. ఇజ్రాయెల్ గనుక తన మొండి వైఖరిని మార్చుకోకపోతే, రాబోయే రోజుల్లో పశ్చిమ ఆసియాలో మళ్లీ యుద్ధ మేఘాలు కమ్ముకునే ప్రమాదం ఉందని ప్రపంచ దేశాలు ఆందోళన వ్యక్తం చేస్తున్నాయి.