కాలుష్యం కారణంగా చాలా మంది ఢిల్లీని వదిలి వేరే చోటికి వెళ్లిపోతుంటే లేదా వెళ్లాలని ఆలోచిస్తుంటే.. ఏడు సముద్రాల అవతల ఉన్న ఒక అమెరికా పౌరుడు మాత్రం ఇక్కడే నివసించాలని కోరుకుంటున్నాడు. దీని వెనుక ఉన్న కారణం కూడా చాలా ఆసక్తికరంగా ఉంది.
సదరు అమెరికన్ పౌరుడు తన దేశంలో ఉండి ఉండి అలసిపోయాడట. ఇప్పుడు ఆయనకు భారత్ బాగా నచ్చేసింది, అందులోనూ నివసించడానికి ఢిల్లీని ఎంచుకున్నాడు. దీనిపై ఆయన రెడిట్ (Reddit) వేదికగా ప్రజల సలహాలు కూడా కోరాడు.
తన ఉద్యోగం, దేశంపై విసుగు చెందిన వ్యక్తి 30 ఏళ్ల ఈ అమెరికా పౌరుడు ఇటీవల రెడిట్‌లో ఒక పోస్ట్ చేసి ఇంటర్నెట్‌లో పెద్ద చర్చకు తెరలేపాడు. అమెరికాను శాశ్వతంగా వదిలిపెట్టి, ఢిల్లీలో స్థిరపడి తన జీవితంలో ఒక కొత్త, సంతృప్తికరమైన అధ్యాయాన్ని ప్రారంభించాలనే కోరికను వ్యక్తం చేశాడు. ఈ వ్యక్తి టెలివిజన్ పరిశ్రమలో (TV Industry) ఆర్థికంగా గొప్ప విజయాన్ని సాధించిన ఒక శ్వేతజాతీయుడు. ఆ విజయం వల్లనే ఆయన ముందే పదవీ విరమణ (Early Retirement) పొందాడు. కెరీర్ నుండి తప్పుకున్నాక, అమెరికాలోని జీవనశైలిపై ఆయనకు విరక్తి కలిగి తీవ్ర నిరాశకు గురయ్యాడు. జీవితంలో ఒక అర్థవంతమైన మార్పు కోసం చూస్తూ, భారత్‌ను.. ప్రత్యేకించి ఢిల్లీని తన కొత్త నిల్వయంగా ఎంచుకున్నాడు.
అసలు కారణం ఇదే భారతీయ సంస్కృతి తనకు కొత్తేమీ కాదని ఆయన తన పోస్ట్‌లో పేర్కొన్నాడు. భారతీయ ఆహారం మరియు ఇక్కడి మహిళల పట్ల తనకున్న ఇష్టాన్ని తెలియజేస్తూ.. “నాకు భారతీయ భోజనం మరియు మహిళలు అంటే ఇష్టం” అని రాశాడు. అంతేకాకుండా, ప్రస్తుతం ఆయన పనిచేస్తున్న కంపెనీలో చాలా మంది భారతీయ నిపుణులు ఉన్నారని తెలిపాడు. ఒక విదేశీయుడిగా ఢిల్లీలో మంచి జీవితాన్ని గడపడం సాధ్యమేనా? అని ఆయన నెటిజన్లను అడిగాడు.
వైవిధ్యమైన స్పందనలు ఈ పోస్ట్‌పై నెటిజన్లు రకరకాలుగా స్పందించారు. ప్రోత్సాహకరమైన మాటలతో పాటు, ఆచరణాత్మక సలహాలు, జోకులు మరియు హెచ్చరికలు కూడా వచ్చాయి. అమెరికా జీవితంపై ఆయనకున్న విసుగును నెటిజన్లు అర్థం చేసుకున్నారు. ఇంత పెద్ద మార్పు గురించి ఆలోచిస్తున్నందుకు ఆయనను ధైర్యవంతుడిగా పేర్కొన్నారు. భారతీయ సమాజంలో విదేశీయులను చాలా ఆదరిస్తారని కొందరు స్వాగతించారు. అయితే, స్పందనలలో ఎక్కువ భాగం ఢిల్లీలోని గాలి నాణ్యత (AQI) గురించి ఉన్నాయి. ఇది అక్కడ నివసించడానికి ఒక పెద్ద అడ్డంకి అని నెటిజన్లు హెచ్చరించారు.
ఒక యూజర్ స్పందిస్తూ.. “ఢిల్లీలో మీకు ఖచ్చితంగా గౌరవం లభిస్తుంది. అయితే అప్పుడప్పుడు కొన్ని వ్యంగ్య వ్యాఖ్యలు వినిపించినా, మెజారిటీ ప్రజలు మిమ్మల్ని సాదరంగా ఆహ్వానిస్తారు” అని రాశారు. మరికొందరు ఆయనను కేవలం ఢిల్లీకే పరిమితం కాకుండా, ఒక నిర్ణయానికి వచ్చే ముందు భారత్‌లోని ఇతర ప్రాంతాలను కూడా చూడమని సూచించారు. “భారతదేశం అంతా పర్యటించండి.. ఢిల్లీలో ఉండండి, గోవా వెళ్లండి, కేరళలో ప్రశాంతంగా టీ తాగుతూ ఎంజాయ్ చేయండి, ఈశాన్య రాష్ట్రాల వర్షాలను చూడండి, హిమాచల్ పర్వతాల అందాలను ఆస్వాదించండి. ఆ తర్వాత ఎక్కడ ఉండాలో నిర్ణయించుకోండి. అద్భుతమైన ఆహారం మీకు ఎక్కడైనా దొరుకుతుంది” అని సలహా ఇచ్చారు.