“అమ్మాయి చనిపోయినా పర్లేదు.. కారు కడిగేందుకు డబ్బులు ఇవ్వండని అడిగిన డ్రైవర్..!” వందల కోట్లు ముఖాన కొట్టి నోరు మూయించాలని చూసిన ఉబెర్ కంపెనీ.. కానీ తల్లిదండ్రులు తీసుకున్న సంచలన నిర్ణయం..!!

అమెరికాలోని కాలిఫోర్నియా రాష్ట్రంలో, ‘ఉబెర్’ (Uber) క్యాబ్ డ్రైవర్ ఒకరు 23 ఏళ్ల యువతిని అర్ధరాత్రి వేళ ప్రమాదకరమైన జాతీయ రహదారిపైనే బలవంతంగా కారులోంచి దింపేసి వెళ్లిపోయాడు.

ఆ తర్వాత అతివేగంగా వచ్చిన మరొక వాహనం ఢీకొట్టడంతో ఆ యువతి దారుణంగా ప్రాణాలు కోల్పోయిన ఘటన తీవ్ర దిగ్భ్రాంతిని కలిగించింది.

గత 2023 ఆగస్టు 12న, ఎమిలీ నార్మాండిన్-పార్కర్ అనే యువతి మరియు ఆమె స్నేహితురాలు ఇంటికి వెళ్లడం కోసం ఉబెర్ కారును బుక్ చేసుకున్నారు. ప్రయాణ సమయంలో ఎమిలీ స్నేహితురాలికి ఆరోగ్యం క్షీణించి కారులోనే వాంతి చేసుకోవడంతో, ఆగ్రహానికి గురైన డ్రైవర్ వూ ట్రాన్ కారును ప్రమాదకరమైన హైవే పక్కన నిలిపి, వారిద్దరినీ బలవంతంగా కిందకు దింపేశాడు.

కారులోంచి దింపేసిన కాసేపటికే వెనుక నుంచి అతివేగంగా వచ్చిన వాహనం ఢీకొట్టడంతో ఎమిలీ అక్కడికక్కడే దుర్మరణం చెందింది. ప్రమాదకరమైన జాతీయ రహదారిపై యువతులను దింపేసిన డ్రైవర్, వారికి సాయం చేయడం కానీ లేదా పోలీసులకు సమాచారం ఇవ్వడం కానీ చేయకుండా.. కారు మురికిగా మారినందుకు ‘క్లీనింగ్ ఛార్జీలు’ వసూలు చేయడం గురించే ఉబెర్ సంస్థకు ఫోన్ చేసి మాట్లాడాడు.

ఈ కేసు కోర్టుకు చేరగా, డ్రైవర్ ఒక స్వతంత్ర కాంట్రాక్టర్ (ఇండిపెండెంట్ కాంట్రాక్టర్) మాత్రమేనని, అతని చర్యలకు సంస్థ బాధ్యత వహించదని ఉబెర్ తరఫున వాదించారు. అయినప్పటికీ, డ్రైవర్ ప్రయాణికురాలి భద్రతను పట్టించుకోకుండా కారు గురించే ఆందోళన చెందాడని, వారిని సురక్షితమైన ప్రదేశంలో దింపి ఉండాల్సిందని న్యాయమూర్తి స్పష్టం చేశారు.

చివరికి, ఈ కేసులో బాధితురాలైన ఎమిలీ తల్లిదండ్రులకు ఉబెర్ సంస్థ 4 కోట్ల డాలర్లు (భారతీయ కరెన్సీలో సుమారు రూ. 330 కోట్లు) పరిహారంగా చెల్లించాలని రిటైర్డ్ జడ్జి తీర్పునిచ్చారు. కంపెనీని నమ్మినందుకు తమ కుమార్తె తన ప్రాణాలనే మూల్యంగా చెల్లించిందని ఎమిలీ తల్లిదండ్రులు తీవ్ర వేదనతో తెలిపారు.