“అమ్మా..! నా భర్త ఆఫీసుకు వెళ్లిన తర్వాత మళ్లీ ఫోన్ చేస్తా” అని తల్లితో చెప్పిన కొద్దిసేపటికే.. అదే ఫోన్ నుంచి వచ్చిన మరో కాల్‌తో ఆ తల్లి గుండెలు పగిలిపోయాయి. కరెంట్ షాక్‌తో చనిపోయిందంటూ సమాచారం.. కానీ ఒంటిపై కనిపించిన గాయాలు మాత్రం మరో కథను చెప్పాయి. పెళ్లైన కొద్ది నెలల్లోనే యువతి అనుమానాస్పద మృతి.. చివరకు కోర్టు సంచలన తీర్పు!
ఉత్తరప్రదేశ్‌లోని బిజ్‌పూర్ జిల్లా తంబూర్ ప్రాంతంలో జరిగిన ఓ యువతి హత్య కేసులో కోర్టు కీలక తీర్పు వెలువరించింది. పెళ్లైన కొద్ది నెలల్లోనే కట్న వేధింపులకు గురై మృతి చెందిన చిత్రా అనే మహిళకు న్యాయం జరిగినట్లు కోర్టు తీర్పు వెల్లడించింది.
చిత్రా జీవితం పెళ్లి తర్వాత సంతోషంగా సాగుతుందని ఆమె కుటుంబం భావించింది. కానీ ఓ ఫోన్ కాల్ ఆ కుటుంబంలో విషాదాన్ని నింపింది.
2024 ఆగస్టు 13న ఉదయం సుమారు 8:28 గంటలకు చిత్రా తన తల్లి సుమిత్రా దేవికి ఫోన్ చేసింది. తన భర్త సందీప్ కుమార్ ఆఫీసుకు వెళ్లిన తర్వాత మళ్లీ ప్రశాంతంగా మాట్లాడతానని తల్లితో చెప్పి ఫోన్ కట్ చేసింది.
కూతురు మళ్లీ ఫోన్ చేస్తుందని తల్లి ఎదురుచూస్తుండగా.. కొన్ని గంటల తర్వాత చిత్రా నంబర్ నుంచే మరో ఫోన్ వచ్చింది. ఫోన్ చేసిన వ్యక్తి తాను సందీప్‌కు బావమరిది అని చెప్పి.. చిత్రా కరెంట్ షాక్‌తో మృతి చెందిందని విషాద వార్త చెప్పాడు.
అయితే చిత్రా తండ్రి మహేంద్ర పాల్ సింగ్ వాదన ప్రకారం.. 2023 నవంబర్ 25న తంబూర్‌కు చెందిన సందీప్ కుమార్‌తో చిత్రాకు వివాహం జరిగింది. కుటుంబ స్థోమతకు తగ్గట్టుగా కట్నం ఇచ్చినప్పటికీ.. పెళ్లైన కొద్ది రోజులకే సందీప్, అతని తల్లిదండ్రులు అదనపు కట్నం కోసం చిత్రను వేధించడం ప్రారంభించారని కుటుంబ సభ్యులు ఆరోపించారు.
కూతురు చనిపోయిందని సమాచారం అందుకున్న తల్లిదండ్రులు హుటాహుటిన అక్కడికి వెళ్లారు. అక్కడ కనిపించిన దృశ్యం వారిని తీవ్ర దిగ్భ్రాంతికి గురిచేసింది.
చిత్రా తల వెనుక భాగంలో తీవ్ర గాయం కనిపించింది. చేతులు, కాళ్లు, మెడపై కూడా గాయాల గుర్తులు ఉన్నాయని కుటుంబ సభ్యులు తెలిపారు. శరీరంపై రక్తపు మరకలు కూడా కనిపించాయి. దీంతో కరెంట్ షాక్‌తో మృతి చెందిందన్న అత్తింటి వారి వాదనపై అనుమానాలు వ్యక్తమయ్యాయి.
అంతేకాకుండా.. పోలీసులకు సమాచారం ఇవ్వకుండా అత్తింటి వారు కొన్ని గంటల పాటు ఆలస్యం చేయడం కూడా కుటుంబ సభ్యుల అనుమానాలకు మరింత బలం చేకూర్చింది.
దీంతో చిత్రా తండ్రి ఇచ్చిన ఫిర్యాదు ఆధారంగా పోలీసులు ఆమె భర్త సందీప్ కుమార్, మామ బ్రిజ్‌పాల్ సింగ్, అత్త ప్రమోద్ దేవిపై కేసు నమోదు చేసి అరెస్టు చేశారు.
ఈ కేసుపై కోర్టులో దాదాపు రెండేళ్ల పాటు విచారణ కొనసాగింది. సాక్ష్యాలు, ఆధారాలను పరిశీలించిన అనంతరం కోర్టు తాజాగా తీర్పు వెలువరించింది.
చిత్రా భర్త సందీప్ కుమార్‌కు హత్య నేరం కింద జీవిత ఖైదుతో పాటు రూ.20,000 జరిమానా విధించింది.
అలాగే మామ బ్రిజ్‌పాల్ సింగ్, అత్త ప్రమోద్ దేవికి చెరో రెండేళ్ల జైలు శిక్ష విధించింది. ముగ్గురు నిందితులకు కలిపి మొత్తం రూ.30,000 జరిమానా కూడా విధించినట్లు సమాచారం.
ఉదయం తల్లితో ప్రేమగా మాట్లాడిన చిత్రా.. కొన్ని గంటల్లోనే విగతజీవిగా మారడం ఆమె కుటుంబాన్ని తీవ్ర విషాదంలోకి నెట్టింది.
కట్న వేధింపుల ఆరోపణలతో జరిగిన ఈ కేసులో వెలువడిన కోర్టు తీర్పు.. కట్నం కోసం మహిళలను వేధించే వారికి గట్టి హెచ్చరికగా నిలిచిందని కుటుంబ సభ్యులు భావిస్తున్నారు.
Leave a Reply