నోయిడా: నోయిడాలో ఒక ఇంజనీరింగ్ విద్యార్థి ఉరివేసుకుని ఆత్మహత్య చేసుకున్న ఘటన కలకలం సృష్టించింది. ఘటనా స్థలంలో లభ్యమైన సూసైడ్ నోట్‌లో.. “అమ్మా, నా చదువు కోసం ఇక డబ్బు ఖర్చు చేయవద్దు. నేను ఇక భరించలేకపోతున్నాను!” అని రాసి ఉండటం అందరినీ కలిచివేస్తోంది.
పోలీసులు తెలిపిన వివరాల ప్రకారం.. మృతుడి పేరు ఆకాశదీప్. ఇతడు ఢిల్లీ టెక్నికల్ క్యాంపస్‌లో కంప్యూటర్ సైన్స్ మొదటి సంవత్సరం చదువుతున్నాడు. బీహార్‌కు చెందిన ఆకాశదీప్, చదువు నిమిత్తం గ్రేటర్ నోయిడాలోని నాలెడ్జ్ పార్క్ ప్రాంతంలో ఉన్న ఒక ప్రైవేట్ హాస్టల్‌లో ఉంటున్నాడు. మంగళవారం సాయంత్రం రూమ్మేట్ గదిలో లేని సమయంలో ఆకాశదీప్ ఈ అఘాయిత్యానికి పాల్పడ్డాడు. రూమ్మేట్ తిరిగి వచ్చి చూసేసరికి ఆకాశదీప్ ఫ్యాన్‌కు వేలాడుతూ కనిపించాడు. వెంటనే ఆసుపత్రికి తరలించినప్పటికీ, అతను అప్పటికే మరణించినట్లు వైద్యులు ప్రకటించారు.
సూసైడ్ నోట్‌లో ఏముంది? ఆకాశదీప్ గదిలో లభించిన లేఖలో తన మనోవేదనను ఇలా వ్యక్తపరిచాడు:
“అమ్మా, 11 మరియు 12వ తరగతుల్లో నేను ఎదుర్కొన్న పరిస్థితులను ఇక్కడ మళ్లీ చూడాలనుకోవడం లేదు. ఇక్కడ నా సంవత్సరాలను వృథా చేయదలచుకోలేదు. నేను నా ఓటమిని అంగీకరిస్తున్నాను. నేను ఇక్కడ నాలుగేళ్ల పాటు ఉండలేను. నా కోసం ఇక డబ్బు వృథా చేయకండి. మీకు లేనిపోని ఆశలు కల్పించడం నాకు ఇష్టం లేదు, అందుకే అన్నింటినీ ఇక్కడితో ముగించేస్తున్నాను. 11-12 తరగతుల్లో నా ఫలితాలు చాలా దారుణంగా ఉన్నాయి, ఇక్కడ కూడా అలాగే జరుగుతుందని భయపడుతున్నాను. నన్ను క్షమించండి!”
తన మరణానికి ఎవరూ కారణం కాదని కూడా ఆ లేఖలో పేర్కొన్నాడు: “అమ్మా-నాన్నా, నన్ను క్షమించండి. నేను నిజంగా బలహీనుడిని. వేరే ఎవరి వల్లో నేను ఇది చేస్తున్నానని అనుకోకండి. నా మరణానికి నేనే బాధ్యుడిని. దీని గురించి ఎవరినీ ఏమీ అనకండి.”
పోలీస్ అధికారి అరవింద్ కుమార్ చాహల్ మాట్లాడుతూ.. “బాలుడు బీహార్ నివాసి. మాకు ఒక సూసైడ్ నోట్ దొరికింది. చదువు ఒత్తిడి కారణంగానే అతను ఆత్మహత్య చేసుకున్నట్లు ప్రాథమికంగా అర్థమవుతోంది. మేము కేసు నమోదు చేసి దర్యాప్తు చేస్తున్నాము” అని తెలిపారు.