వన్యప్రాణులకు, పెంపుడు జంతువులకు మధ్య జరిగే భీకర పోరాటాలు సోషల్ మీడియాలో వైరల్ అవ్వడం సహజం.
ఆ కోవలోనే, అర్ధరాత్రి వేళ ఇంటి ముందు ప్రశాంతంగా నిద్రిస్తున్న ఒక కుక్కపై చిరుతపులి మెరుపు వేగంతో దాడి చేయడం.. ఆ తర్వాత ఊహించని మలుపు చోటుచేసుకోవడం లాంటి దృశ్యాలతో కూడిన వీడియో ఒకటి ప్రస్తుతం నెట్టింట హల్చల్ చేస్తోంది.
ఈ భయానక దృశ్యం అక్కడి సీసీటీవీ (CCTV) కెమెరాలో రికార్డై చూసేవారిని ఆశ్చర్యానికి గురిచేస్తోంది. ఇంటి వరండాలో గాఢ నిద్రలో ఉన్న కుక్కను పసిగట్టిన ఓ చిరుతపులి, దాన్ని వేటాడేందుకు మెల్లగా అడుగులు వేస్తూ సమీపించింది.
మరుక్షణంలోనే తీవ్ర ఆకలితో ఉన్న ఆ చిరుత ఒక్కసారిగా కుక్కపైకి దూకింది. కానీ, ఆ ప్రాణాంతక క్షణంలో ఏమాత్రం భయపడకుండా ఆ కుక్క ప్రదర్శించిన సమయస్ఫూర్తి, ప్రాణాలు కాపాడుకోవడానికి చూపించిన తెగువ చిరుతపులినే ఒక్క క్షణం హడలెత్తించింది.
తనను తాను రక్షించుకునేందుకు ఆ కుక్క తీవ్రంగా ఎదురుదాడికి దిగిన తీరును చూసి బెదిరిపోయిన చిరుతపులి, తన వేటను అర్ధాంతరంగా విరమించుకుని వచ్చిన దారినే తోకముడిచి పారిపోయింది. సోషల్ మీడియాలో వైరల్ అవుతున్న ఈ సీసీటీవీ దృశ్యాలను చూసిన నెటిజన్లు, ఆ కుక్క చూపిన ధైర్యాన్ని, తెగువను చూసి అవాక్కవుతున్నారు.
“ప్రాణాపాయం ముంచుకొచ్చినప్పుడు ఏ జీవి అయినా తన సర్వశక్తులనూ ఒడ్డి పోరాడుతుందనడానికి ఈ వీడియోనే నిదర్శనం” అంటూ నెటిజన్లు కామెంట్ల వర్షం కురిపిస్తున్నారు. అర్ధరాత్రి వేళ చోటుచేసుకున్న ఈ ఉత్కంఠభరిత దృశ్యం ప్రస్తుతం సోషల్ మీడియాలో తీవ్ర చర్చనీయాంశంగా మారింది.