ఉత్తరప్రదేశ్ రాష్ట్రం మౌ (Mau) ప్రాంతానికి చెందిన మొదటి తరగతి విద్యార్థిని ‘సమ్రా నాజ్’ (Samra Naz) తన చిన్నారి చేతులతోనే ఒక పెద్ద మార్పును తీసుకువచ్చి అందరినీ ఆశ్చర్యపరిచింది.
తన ఇంటి నుండి బడికి వెళ్లే దాదాపు 25 మీటర్ల రహదారి అత్యంత అధ్వానంగా, బురదమయంగా ఉండటంతో రోజూ పడుతున్న అవస్థలను చూసి ధైర్యంగా ఒక నిర్ణయం తీసుకుంది.
వర్షాకాలంలో ఆ బురదలో జారిపడి పలుమార్లు దెబ్బలు తగలడం, స్కూల్ యూనిఫామ్ కూడా పాడైపోవడంతో తీవ్ర వేదనకు గురైన ఆ చిన్నారి, దాదాపు 20 రోజుల క్రితం సోషల్ మీడియా ద్వారా తన ఊరి సమస్యను వెలుగులోకి తెచ్చింది. ప్రజల నుండి లభించిన మద్దతుతో, గత ఆగస్టు 31వ తేదీన జిల్లా కలెక్టర్ ఆనంద్ వర్ధన్‌ను నేరుగా కలెక్టరేట్‌లో కలిసి వినతిపత్రం అందజేసింది.
చిన్నారి సమస్యను దయతో విన్న జిల్లా కలెక్టర్ ఆనంద్ వర్ధన్, తక్షణమే అధికారులను ఘటనా స్థలానికి పంపించి రహదారిని బాగుచేయాలని ఆదేశించారు. అధికారుల వేగవంతమైన చర్యలతో కొద్ది రోజుల్లోనే ఆ రహదారిని బాగుచేసి కొత్తగా నిర్మించారు.
రోడ్డు పనులు విజయవంతంగా పూర్తి కావడంతో, మంగళవారం మధ్యాహ్నం 2 గంటల ప్రాంతంలో జిల్లా కలెక్టర్ ఆనంద్ వర్ధన్ నేరుగా సమ్రా నాజ్ ఇంటికే వెళ్లి ఆమెను ఆశ్చర్యపరిచారు. చిన్నారి ధైర్యాన్ని ప్రశంసించిన కలెక్టర్, ఆమెకు ఒక కొత్త సైకిల్‌ను కానుకగా ఇచ్చారు. అంతేకాకుండా, ఆ ప్రాంతంలోని ఇతర పిల్లలకు చాక్లెట్లు పంచి తన సంతోషాన్ని వ్యక్తం చేశారు. ఒక చిన్నారి చేసిన చిన్న ప్రయత్నం, ఊరి రూపురేఖలనే మార్చేసిన ఈ సంఘటన ప్రస్తుతం చాలామంది ప్రశంసలు అందుకుంటూ వైరల్ అవుతోంది.
Leave a Reply