గిన్నిస్ వరల్డ్ రికార్డు సాధించాలనే పిచ్చితో ఒకేసారి వందలాది టీ-షర్టులను ఒంటిపై ధరిస్తూ లైవ్ స్ట్రీమింగ్ చేసిన ‘2xRaKai’గా గుర్తింపు పొందిన యువ స్ట్రీమర్ రాకాయ్ (RaKai), ఊపిరాడక తీవ్ర అస్వస్థతకు గురై లైవ్‌లోనే అత్యవసర సహాయం కోసం ‘911’ నంబర్‌కు కాల్ చేసిన ఘటన ఇంటర్నెట్‌లో తీవ్ర సంచలనం సృష్టిస్తోంది.
అక్టోబర్ 13–14 తేదీల్లో చేపట్టిన ఈ లైవ్ స్ట్రీమ్ ఛాలెంజ్‌లో భాగంగా, ఒకదానిపై ఒకటి వందలాది టీ-షర్టులను తొడుక్కుంటూ సరికొత్త రికార్డు నెలకొల్పేందుకు అతడు ప్రయత్నించాడు. అయితే ఆ బట్టల బరువు, ఒత్తిడి పెరిగిపోవడంతో అతనికి ఊపిరి తీసుకోవడం కష్టంగా మారింది. కనీసం శరీరాన్ని కదల్చలేని నిస్సహాయ స్థితికి చేరుకున్నాడు.
తీవ్ర ఊపిరాడక ఏం చేయాలో పాలుపోని రాకాయ్, లైవ్ ప్రసారం అవుతుండగానే అత్యవసర విభాగం 911కి ఫోన్ చేశాడు. తాను రికార్డు సాధించే ప్రయత్నంలో ఉన్నానని, అయితే ఒంటిపై ఉన్న టీ-షర్టులను తాను స్వయంగా విప్పలేకపోతున్నానంటూ విలవిల్లాడుతూ సహాయం అర్థించాడు.
పరిస్థితి ప్రమాదకరంగా మారడంతో పక్కనే ఉన్నవారు వెంటనే అప్రమత్తమై, అతని ప్రాణాలను కాపాడేందుకు ఒంటిపై ఉన్న ఆ లెక్కలేనన్ని టీ-షర్టులను ఒక్కొక్కటిగా విప్పేందుకు సహాయం చేశారు. అయితే అత్యవసర సేవల హెల్ప్‌లైన్‌ను ఇలాంటి వాటికి దుర్వినియోగం చేయడంపై గతంలోనే పోలీసులు అతడిని హెచ్చరించినట్లు తెలుస్తోంది.
ప్రస్తుతం ఈ విభాగంలో కెనడాకు చెందిన టెడ్ హేస్టింగ్స్ (Ted Hastings) 2019లో ఒకేసారి 260 టీ-షర్టులను ధరించి నెలకొల్పినదే అధికారిక గిన్నిస్ రికార్డుగా కొనసాగుతోంది. తగిన భద్రతా జాగ్రత్తలు, సరైన ప్రణాళిక లేకుండా ఇలాంటి ప్రమాదకర విన్యాసాలకు పాల్పడటం ఎంతటి ముప్పును తెచ్చిపెడుతుందో ఈ సంఘటన మరోసారి స్పష్టం చేసింది.
Leave a Reply