“అయ్యో దారుణమే!” – వివాహేతర సంబంధం కోసం భార్యను చంపినవాడికి జైలులో మరో ప్రేయసా? కుటుంబాన్నే నాశనం చేసిన నేరస్థుడిని పెళ్లి చేసుకోవడానికి సిద్ధపడ్డ మహిళ!

2018వ సంవత్సరంలో తన గర్భవతి అయిన భార్యను, ఇద్దరు పసిపిల్లలను దారుణంగా హత్య చేసిన కేసులో యావజ్జీవ కారాగార శిక్ష అనుభవిస్తున్న క్రిస్ వాట్స్ (Chris Watts), ప్రస్తుతం జైలు నుంచే రెండో పెళ్లి చేసుకోవడానికి సిద్ధమవుతున్నాడు.

ఒహియోకు చెందిన లిజ్జీ హెండర్సన్ అనే మహిళతో అతడికి ప్రేమ చిగురించిన నేపథ్యంలో, ఆమెను వివాహం చేసుకోవడానికి వాట్స్ పిటిషన్ దాఖలు చేశాడు. ఈ బంధాన్ని ఖరారు చేసేలా, లిజ్జీ తన పేరును ‘లిజ్జీ వాట్స్’గా మార్చుకోవడానికి దరఖాస్తు చేసుకోవడమే కాకుండా, గతంలో జైలులో ఉన్న వాట్స్‌ను పలుమార్లు నేరుగా కలిసి సమయాన్ని గడిపినట్లు సమాచారం వెలువడింది.

పరోల్ వచ్చే అవకాశం కూడా లేని విధంగా కఠినమైన యావజ్జీవ శిక్షలను అనుభవిస్తున్న క్రిస్ వాట్స్ చేసిన నేరం గుండెలను పిండేసేలా ఉంటుంది. తన 34 ఏళ్ల గర్భవతి భార్య షనాన్‌ను చంపి లోతు లేని గోతిలో పూడ్చిపెట్టిన అతడు, 4 మరియు 3 ఏళ్ల వయస్సు ఉన్న తన కుమార్తెల మృతదేహాలను ముడి చమురు (Crude Oil) ట్యాంకుల్లో కనికరం లేకుండా పడేసాడు. తనతో పాటు పనిచేసే మరొక మహిళతో అక్రమ సంబంధం ఉన్న అతడు, ఆ మహిళతో కొత్త జీవితాన్ని ప్రారంభించడం కోసమే తన సొంత కుటుంబాన్ని పథకం ప్రకారం అంతం చేసినట్లు అధికారుల ముందు అంగీకరించాడు.

ఇదిలా ఉండగా, గతంలో వాట్స్‌తో అక్రమ సంబంధంలో ఉన్న సదరు సహోద్యోగి, అతడి గురించి పలు షాకింగ్ విషయాలను వెల్లడించింది. షనాన్‌కు తనకు మధ్య ఎలాంటి సంబంధం లేదని, ఆమె కేవలం పిల్లలకు తల్లి మాత్రమేనని వాట్స్ తనతో నిరంతరం అబద్ధాలు చెప్పి నమ్మించాడని తెలిపింది. అంతేకాకుండా, కుటుంబాన్ని హత్య చేయడానికి ముందు రోజుల్లో వాట్స్ ప్రవర్తన చాలా విచిత్రంగా, భయాందోళన కలిగించేలా ఉండేదని, దగ్గరగా ఉన్నప్పుడు అతడు చాలా క్రూరంగా ప్రవర్తించేవాడని ఆ మహిళ పోలీసులకు ఇచ్చిన వాంగ్మూలంలో పేర్కొంది.