జీవితం ఏ క్షణంలో ఎలాంటి విషాదాన్ని మిగులుస్తుందో చెప్పలేమనడానికి నిదర్శనంగా.. అమెరికాలోని యూటా రాష్ట్రంలో 9 మంది పిల్లల తల్లి అయిన నిండు గర్భిణి ఘోర రోడ్డు ప్రమాదంలో దుర్మరణం చెందిన ఘటన ప్రపంచవ్యాప్తంగా తీవ్ర విషాదాన్ని నింపింది.
తన కుటుంబంతో సంతోషంగా జీవిస్తున్న రెబెక్కా హాఫెన్ అనే మహిళ, తన 10వ బిడ్డకు జన్మనిచ్చే మధుర క్షణాల కోసం ఎదురుచూస్తున్న సమయంలో అనూహ్యంగా చోటుచేసుకున్న భీకర రోడ్డు ప్రమాదంలో ప్రాణాలు కోల్పోయింది.
ప్రమాదం జరిగిన వెంటనే ఘటనా స్థలానికి చేరుకున్న వైద్య బృందం, తల్లి అప్పటికే మృతి చెందినట్లు గుర్తించి తీవ్ర దిగ్భ్రాంతికి గురైంది. అయితే గర్భంలో ఉన్న పసికందును కాపాడేందుకు వైద్యులు తీవ్రంగా శ్రమించారు. అదృష్టవశాత్తూ అత్యవసరంగా సిజేరియన్ శస్త్రచికిత్స నిర్వహించి, తల్లి గర్భం నుంచి ఆ పసిగుడ్డును ప్రాణాలతో బయటకు తీశారు.
అయినప్పటికీ, నెలలు నిండకుండానే జన్మించడం, ప్రమాద తీవ్రత కారణంగా ఆ పసికందు ప్రస్తుతం ఐసీయూలో వెంటిలేటర్‌పై మృత్యువుతో పోరాడుతోంది. తల్లి ప్రేమ, లాలనలో పెరగాల్సిన తొమ్మిది మంది చిన్నారులు.. పుట్టిన కొద్ది గంటలకే తల్లికి దూరమై ఆసుపత్రిలో ప్రాణాపాయ స్థితిలో కొట్టుమిట్టాడుతున్న పసికందును చూసి తండ్రితో పాటు కన్నీరుమున్నీరవుతున్న దృశ్యాలు చూపరుల గుండెల్ని పిండేస్తున్నాయి.
తల్లి లేని ఆ కుటుంబ భవిష్యత్తును, చిన్నారుల సంరక్షణను, ఆసుపత్రి ఖర్చులను దృష్టిలో ఉంచుకుని క్రౌడ్‌ఫండింగ్ ద్వారా ప్రారంభించిన నిధుల సేకరణకు ప్రపంచవ్యాప్తంగా వేలాది మంది స్పందిస్తున్నారు. పెద్ద ఎత్తున ఆర్థిక సాయాన్ని అందిస్తూ ఆ కుటుంబానికి తమ ప్రగాఢ సానుభూతిని తెలియజేస్తున్నారు.