చైనాలోని నగరాలు చాలా శుభ్రంగా ఉంటాయనే ప్రజల సాధారణ అపోహను బద్దలు కొడుతూ, ప్రణవ్ అనే భారతీయ యువకుడు పోస్ట్ చేసిన ఒక వీడియో ప్రస్తుతం సోషల్ మీడియాలో వైరల్ అవుతోంది.
చైనాలోని గ్వాంగ్‌జౌ (Guangzhou) నగరానికి చెందిన హైజు (Haizhu) ప్రాంతంలోని నివాసాలు, వీధుల వాస్తవ పరిస్థితిని అతను తన వీడియోలో వెలుగులోకి తెచ్చాడు.
ఆ వీడియోలో.. ఆ ప్రాంతంలోని పాత భవనాలు, వేలాడుతున్న కరెంటు తీగలు, ఎక్కడ పడితే అక్కడ చెల్లాచెదురుగా పడి ఉన్న చెత్తాచెదారం, నిర్మాణ పనులకు సంబంధించిన దృశ్యాలు స్పష్టంగా రికార్డయ్యాయి. అచ్చం ఇండియాలోని ఒక సాధారణ వీధిలాగే కనిపిస్తున్న ఆ ప్రదేశాన్ని లైవ్ చేసిన ప్రణవ్.. అక్కడి ప్రజల ముఖాలు తప్ప మిగతా అంతా మన ఊరిలాగే ఉందని ఆశ్చర్యంగా చెప్పాడు.
గోడలపై అతికించిన ప్రకటనలు, దుకాణాల బయట పారబోసిన ప్లాస్టిక్ వ్యర్థాలను చూపించిన అతను.. మన స్థానిక మార్కెట్లు వీటికంటే చాలా శుభ్రంగా, అందంగా ఉంటాయని పేర్కొన్నాడు. అంతేకాకుండా, ప్రపంచవ్యాప్తంగా ఎప్పుడూ భారతదేశాన్ని మాత్రమే “అపరిశుభ్రమైన దేశం” అని ఎందుకు చిత్రీకరిస్తున్నారనే ముఖ్యమైన ప్రశ్నను కూడా తన పోస్ట్‌లో లేవనెత్తాడు.
ప్రపంచంలోని అన్ని దేశాల్లోనూ ఇలాంటి అధ్వాన్నమైన మౌలిక సదుపాయాలు ఉన్న ప్రాంతాలు ఉండనే ఉంటాయి. కానీ, సోషల్ మీడియాలో ఎప్పుడూ భారతదేశాన్ని మాత్రమే టార్గెట్ చేసి తప్పుడు ఇమేజ్ క్రియేట్ చేయడం ఏమాత్రం న్యాయం కాదని అతను ఆవేదన వ్యక్తం చేశాడు.
ప్రణవ్ చేసిన ఈ వీడియోకి నెటిజన్ల నుంచి విశేష మద్దతు లభిస్తోంది. విదేశాలన్నీ శుభ్రంగా ఉంటాయని నమ్మే చాలా మంది అపోహలను ఈ వీడియో తొలగించిందని, కేవలం ఇండియాను మాత్రమే తప్పుగా చిత్రీకరించే అలవాటుకు ఇది సరైన బదులు అని పలువురు కామెంట్లు పెడుతున్నారు.
Leave a Reply