మెరుగైన నిద్ర కోసం చిట్కాలు: చాలా మందికి రాత్రి ఆలస్యమైనా నిద్ర పట్టక, పక్కలు మారుస్తూ ఇబ్బంది పడుతుంటారు. నిద్రకు ముందు కొన్ని అలవాట్లను పాటిస్తే ఈ సమస్యను తగ్గించుకోవచ్చని ఆరోగ్య నిపుణులు చెబుతున్నారు. పడుకోవడానికి కొన్ని గంటల ముందు స్క్రీన్‌లకు దూరంగా ఉండటం, వేడి నీటితో శరీరాన్ని రిలాక్స్ చేయడం, హెర్బల్ డ్రింక్స్ తీసుకోవడం, శ్వాస వ్యాయామాలు మరియు సరైన నిద్ర దినచర్య (Sleep Routine) పాటించడం ద్వారా నిద్ర సమస్యను అధిగమించవచ్చు. దీంతో మరుసటి రోజు ఉదయం ఉత్తేజంగా, ఉల్లాసంగా ఉంటారు.
నిద్ర నాణ్యత పెంచడానికి 5 ముఖ్యమైన చిట్కాలు
- నిద్రకు ఒక గంట ముందు డిజిటల్ డిటాక్స్: మొబైల్, ల్యాప్‌టాప్, టీవీ నుండి వచ్చే బ్లూ లైట్ నిద్రకు సహాయపడే మెలటోనిన్ హార్మోన్ ఉత్పత్తిని నెమ్మదిస్తుంది. దీని కారణంగా, ఫోన్ చూస్తూ పడుకుంటే మెదడు చురుకుగా ఉండి, నిద్ర ఆలస్యం అవుతుంది. కాబట్టి, పడుకోవడానికి కనీసం ఒక గంట ముందు అన్ని స్క్రీన్‌లను ఆపివేయండి (డిజిటల్ డిటాక్స్). ఈ సమయంలో పుస్తకం చదవడం లేదా శాంతంగా సంగీతం వినడం మెదడును నిద్రకు సిద్ధం చేస్తుంది.
- గోరువెచ్చని నీటితో కాళ్లు కడుక్కోవడం: ఆయుర్వేదం, ఆధునిక శాస్త్రం ప్రకారం, నిద్రపోయే ముందు గోరువెచ్చని నీరు శరీరంలోని కండరాలకు విశ్రాంతినిచ్చి, రక్త ప్రసరణను పెంచుతుంది. ఇది మెదడుకు విశ్రాంతి తీసుకోవాల్సిన సమయం ఆసన్నమైందనే సంకేతం పంపుతుంది. స్నానం సాధ్యం కాకపోయినా, గోరువెచ్చని నీటితో కాళ్లు కడుక్కోవడం వల్ల కూడా నిద్ర త్వరగా వస్తుంది.
- కెమోమైల్ టీ లేదా పసుపు పాలు: కెమోమైల్ (Chamomile) టీ కండరాలు, మెదడును శాంతపరచి మంచి నిద్రకు సహాయపడుతుంది. అదే విధంగా పసుపు పాలు (Golden Milk) అలసటను తగ్గించి, మెలటోనిన్ ఉత్పత్తిని పెంచడంలో తోడ్పడుతుంది. నిద్రకు 30 నిమిషాల ముందు ఈ రెండింటిలో ఏదైనా ఒకటి తీసుకోవడం వలన గాఢ నిద్ర పడుతుంది. కెఫిన్ కలిగిన టీ లేదా కాఫీని రాత్రి పూట పూర్తిగా మానుకోవాలి.
- జర్నలింగ్ లేదా శ్వాస వ్యాయామాలు: చాలా మంది ఆఫీస్ టెన్షన్, కుటుంబ బాధ్యతలు వంటి ఆందోళనల కారణంగా నిద్రపోలేరు. ఇలాంటప్పుడు, పడుకునే ముందు 5 నిమిషాలు జర్నలింగ్ (డైరీ రాయడం) చేయడం ద్వారా రోజులోని ఆలోచనలు, చింతలను కాగితంపై లిఖించండి. దీంతో మెదడు తేలికపడుతుంది. లేదా, 4-7-8 శ్వాస పద్ధతి (4 సెకన్లు పీల్చడం, 7 సెకన్లు ఆపడం, 8 సెకన్లు వదలడం) మెదడు, గుండె వేగాన్ని శాంతపరిచి, త్వరగా నిద్ర పట్టడానికి సహాయపడుతుంది.
- పడకను కేవలం నిద్ర కోసమే ఉపయోగించండి: నిపుణుల అభిప్రాయం ప్రకారం, మెదడుకు మరియు పడకకు మధ్య నిద్రా సంబంధం ఏర్పడటం ముఖ్యం. మీరు మంచంపై మొబైల్ వాడినా, సినిమాలు చూసినా లేదా ఆఫీస్ పని చేసినా, మెదడు దాన్ని విశ్రాంతి స్థలంగా కాకుండా, పని చేసే స్థలంగా భావిస్తుంది. అందుకే నిద్ర పట్టదు. మంచంపై కేవలం నిద్ర లేదా విశ్రాంతికి మాత్రమే ప్రాధాన్యత ఇవ్వండి. దీని వలన పడుకోగానే మెదడు విశ్రాంతి సంకేతాన్ని పంపి నిద్ర త్వరగా వచ్చేలా చేస్తుంది.