హైదరాబాద్/న్యూఢిల్లీ: నేటి ఆధునిక కాలంలో జీవనశైలి మారుతున్న కొద్దీ కొన్ని ఆరోగ్య సమస్యలు నిశ్శబ్దంగా ప్రాణాల మీదకు తెస్తున్నాయి. ప్రపంచ ఆరోగ్య సంస్థ (WHO) వెల్లడించిన లెక్కల ప్రకారం, ప్రపంచవ్యాప్తంగా ప్రతిరోజూ 15 నుండి 49 ఏళ్ల మధ్య వయస్సు గల వారిలో 10 లక్షల మందికి పైగా కొత్తగా లైంగిక సంక్రమణ వ్యాధుల (STIs) బారిన పడుతున్నారు. అత్యంత ప్రమాదకరమైన విషయం ఏంటంటే.. వీటిలో మెజారిటీ కేసుల్లో ఎలాంటి లక్షణాలు కనిపించవు.
ఏమిటి ఈ వ్యాధులు? ఎందుకు వస్తాయి?
లైంగిక సంపర్కం ద్వారా ఒకరి నుంచి మరొకరికి వ్యాపించే ఈ ఇన్ఫెక్షన్లు బ్యాక్టీరియా, వైరస్ మరియు పరాన్నజీవుల వల్ల కలుగుతాయి. వీటిలో క్లామిడియా, గనేరియా, సిఫిలిస్ మరియు ట్రైకోమోనియాసిస్ వంటివి మందులతో నయం చేయవచ్చు. కానీ హెచ్‌ఐవీ (HIV), హెపటైటిస్-బి, హెర్పెస్ మరియు హెచ్‌పీవీ (HPV) వంటివి ప్రాణాంతకమైనవి మరియు దీర్ఘకాలం వేధిస్తాయి.
ఎవరు, ఎప్పుడు పరీక్షలు చేయించుకోవాలి? – డాక్టర్ల సలహా
ఫోర్టిస్ ఎస్కార్ట్స్ హాస్పిటల్ డైరెక్టర్ డాక్టర్ నీతి కౌతిష్ అభిప్రాయం ప్రకారం, వయస్సు మరియు జీవనశైలిని బట్టి ప్రతి ఒక్కరూ పరీక్షల షెడ్యూల్ పాటించాలి:
- 25 ఏళ్ల లోపు మహిళలు: లైంగికంగా చురుగ్గా ఉన్న యువతులు సంవత్సరానికి కనీసం ఒకసారి పరీక్షలు చేయించుకోవడం తప్పనిసరి. వీరిలో లక్షణాలు లేని క్లామిడియా వల్ల భవిష్యత్తులో గర్భం దాల్చడంలో సమస్యలు రావచ్చు.
- 25 ఏళ్లు పైబడిన వారు: కొత్త వ్యక్తులతో సంబంధాలు ఏర్పడినప్పుడు లేదా తమ భాగస్వామికి ఇన్ఫెక్షన్ ఉన్నట్లు అనుమానం వచ్చినప్పుడు వెంటనే పరీక్షలు చేయించుకోవాలి.
- గర్భిణీలు: శిశువుకు వ్యాధులు సంక్రమించకుండా ఉండేందుకు గర్భం దాల్చిన తొలినాళ్లలోనే HIV, సిఫిలిస్, హెపటైటిస్ పరీక్షలు చేయించుకోవడం నేడు తప్పనిసరి ప్రక్రియ.
- అధిక ముప్పు ఉన్నవారు: ఒకటి కంటే ఎక్కువ మందితో సంబంధాలు ఉన్నవారు లేదా సురక్షితం కాని పద్ధతులు పాటించే వారు ప్రతి 3 నుండి 6 నెలలకు ఒకసారి పరీక్ష చేయించుకోవడం సురక్షితం.
నిర్లక్ష్యం చేయకూడని లక్షణాలు:
- జననేంద్రియాల నుండి అసాధారణ ద్రవాలు (Discharge) రావడం.
- మూత్ర విసర్జన సమయంలో మంట లేదా నొప్పి.
- పుండ్లు, దద్దుర్లు లేదా దురద కనిపించడం.
- సంభోగ సమయంలో నొప్పి రావడం.