చెన్నై: సూపర్ స్టార్ రజనీకాంత్ హీరోగా, లోకనాయకుడు కమల్ హాసన్కు చెందిన ప్రముఖ నిర్మాణ సంస్థ ‘రాజ్ కమల్ ఫిల్మ్స్ ఇంటర్నేషనల్’ నిర్మిస్తూ, రాక్స్టార్ అనిరుధ్ సంగీతం అందిస్తున్న సరికొత్త చిత్రం ‘ధర్మన్’ (Tharman). ఈ సినిమాకు సంబంధించిన ఫస్ట్ లుక్ పోస్టర్ ఈరోజు అధికారికంగా విడుదలైంది.
కొన్ని నెలల క్రితం వరకు తాత్కాలికంగా ‘తలైవర్ 173’ (Thalaivar 173) అనే వర్కింగ్ టైటిల్తో ప్రారంభమైన ఈ చిత్రానికి.. ఇప్పుడు చిత్ర బృందం ‘ధర్మన్’ అనే పవర్ఫుల్ టైటిల్ను ఖరారు చేసింది. ఈ ప్రాజెక్ట్ అనౌన్స్ అయిన రోజు నుండి పలు వివాదాలు, సంచలనాలకు కేంద్రబిందువుగా మారినప్పటికీ.. ఈరోజు విడుదలైన ఫస్ట్ లుక్ పోస్టర్ రజనీ అభిమానుల్లో సరికొత్త జోష్ నింపింది.
నిన్న రాజ్ కమల్ ఫిల్మ్స్ సంస్థ వదిలిన ప్రీ-లుక్ అనౌన్స్మెంట్ పోస్టర్ సోషల్ మీడియాలో విపరీతంగా వైరల్ అవ్వగా.. అభిమానులు ఎంతగానో ఎదురుచూసినట్లే ఈరోజు ఉదయం 10 గంటలకు ‘ధర్మన్’ ఫస్ట్ లుక్ పోస్టర్ను అధికారికంగా విడుదల చేశారు.
ఈ పోస్టర్లో.. హాస్పిటల్లోని ఆపరేషన్ థియేటర్లో నీలి రంగు షర్ట్, ప్యాంట్ ధరించి, చేతిలో సర్జికల్ కత్తి పట్టుకుని రజనీకాంత్ కనిపిస్తున్నారు. ఆ కత్తి నిండా, అలాగే ఆయన చేతులు, గ్లౌస్లకు రక్తం కారుతుండగా.. రజనీ తనదైన ట్రేడ్మార్క్ స్టైల్లో సెమ మాస్గా నిలబడటం విశేషం.
‘తలైవర్ 173’ – డాక్టర్ పాత్రలో సూపర్ స్టార్:
ఈ లుక్ను బట్టి చూస్తే రజనీకాంత్ ఈ సినిమాలో ఒక పవర్ఫుల్ ‘డాక్టర్’ క్యారెక్టర్లో నటిస్తున్నట్లు స్పష్టంగా అర్థమవుతోంది. దీనికి తోడు పోస్టర్పై ముద్రించిన ‘డెడ్లీ స్లోగన్’ (Deadly Slogan) అనే క్యాప్షన్ అభిమానుల్లో అంచనాలను, కుతూహలాన్ని అమాంతం పెంచేసింది.
‘ఓ మై కడవులే’ మరియు ప్రదీప్ రంగనాథన్ హీరోగా వస్తున్న ‘డ్రాగన్’ వంటి చిత్రాలతో యువతను ఆకట్టుకుని ‘జెన్ జీ’ (Gen Z) దర్శకుడిగా ముద్ర వేసుకున్న అశ్వత్ మారిముత్తు ఈ భారీ చిత్రానికి దర్శకత్వం వహిస్తున్నారు. త్వరలోనే ఈ సినిమా రెగ్యులర్ షూటింగ్ ప్రారంభం కానుందని సమాచారం. అయితే, ఈ ప్రాజెక్ట్ పట్టాలెక్కే ముందు టాలీవుడ్, కోలీవుడ్ సినీ వర్గాల్లో జరిగిన హైడ్రామాను అంత సులభంగా మర్చిపోలేం.
‘ధర్మన్’ చేతులు మారిందిలా – సుందర్ సి నుండి అశ్వత్ వరకు:
మొదట ఈ సినిమా ప్రకటన వచ్చినప్పుడు దర్శకుడు సుందర్.సి ఈ ప్రాజెక్ట్ను హ్యాండిల్ చేయాల్సి ఉంది. గత ఏడాది నవంబర్లో రజనీ, కమల్లతో సుందర్ సి దిగిన ఫోటోలు కూడా బయటకొచ్చాయి. కానీ స్క్రిప్ట్ విషయంలో రజనీకాంత్కు పూర్తి సంతృప్తి కలగకపోవడంతో కేవలం వారం రోజుల్లోనే సుందర్ సి ఈ ప్రాజెక్ట్ నుండి తప్పుకున్నారు. ఆ సమయంలో సుందర్ సి మరియు అతని భార్య ఖుష్బూ పెట్టిన ట్వీట్లు, ఆ వెంటనే వాటిని డిలీట్ చేయడం వంటి పరిణామాలు కోలీవుడ్లో తీవ్ర చర్చకు దారితీశాయి.
ఆ తర్వాత, ‘డాన్’ సినిమా ఫేమ్ దర్శకుడు సిబి చక్రవర్తి ఈ సినిమాను డైరెక్ట్ చేస్తారని అనౌన్స్ చేసి కొన్ని ప్రోమోలు కూడా వదిలారు. రజనీ క్యారెక్టరైజేషన్ గురించి రకరకాల లీకులు కూడా వచ్చాయి. అయితే దురదృష్టవశాత్తూ కొన్ని నెలలకే స్క్రిప్ట్ డిఫరెన్సెస్ వల్ల ఆయన కూడా ఈ ప్రాజెక్ట్ నుండి తప్పుకోవడంతో.. సినిమా పూర్తిగా అగిపోయిందనే రూమర్స్ చక్కర్లు కొట్టాయి. ఆ పుకార్లకు చెక్ పెడుతూనే.. ఇప్పుడు అశ్వత్ మారిముత్తును ఫైనల్ డైరెక్టర్గా అధికారికంగా ప్రకటించారు.
పోస్టర్పై నెటిజన్ల ట్రోల్స్ – ఏఐ (AI) సృష్టినా?:
టైటిల్ మార్పు, ఫస్ట్ లుక్ రిలీజ్తో అభిమానులు పండగ చేసుకుంటున్నప్పటికీ.. ఈ పోస్టర్ సోషల్ మీడియాలో ఒక కొత్త చర్చకు దారితీసింది. పోస్టర్లో రజనీకాంత్ బాడీకి, ఆయన తలకు (ఫేస్) అస్సలు సింక్ అవ్వలేదని, సంబంధం లేనట్లుగా ఉందంటూ కొంతమంది నెటిజన్లు విమర్శలు గుప్పిస్తున్నారు.
“ఇది నిజంగానే రజనీకాంత్ ఫోటోషూటా? లేక ప్రదీప్ రంగనాథన్ బాడీకి రజనీ ఫేస్ అంటించారా? లేదా ఆర్టిఫిషియల్ ఇంటెలిజెన్స్ (AI) ద్వారా క్రియేట్ చేసిన ఫేక్ పోస్టరా?” అంటూ నెటిజన్లు ప్రశ్నిస్తున్నారు. బాడీ అంతా సన్నగా ఉండి, తల మాత్రం కాస్త పెద్దదిగా కనిపిస్తోందని కొందరు కామెంట్లు పెడుతున్నారు. ఏదేమైనా.. ఈ ఫోటో ఎడిటింగ్ లోపాలు, ట్రోల్స్ కారణంగా ఈ ఫస్ట్ లుక్ పోస్టర్ ప్రస్తుతం ఇంటర్నెట్లో అత్యంత వేగంగా ట్రెండ్ అవుతోంది.