చైనా నుండి ఒక హృదయవిదారకమైన కథ వెలుగులోకి వచ్చింది. తన భార్యను కాపాడుకోవడం కోసం ఒక భర్త నేర మార్గాన్ని ఎంచుకోవాల్సి వచ్చిన తీరు ఎవరినైనా కంటతడి పెట్టిస్తుంది. దీనిని చైనాలో ‘అత్యంత భావోద్వేగపూరితమైన మోసం’ అని పిలుస్తున్నారు.
బీజింగ్కు చెందిన లియావో డాన్ మరియు అతని భార్య డూ జిన్లింగ్ ఒక ఫ్యాక్టరీలో పని చేసేవారు. ఉద్యోగం కోల్పోయిన తర్వాత, వారి పరిస్థితి దయనీయంగా మారింది. 2007లో డూ జిన్లింగ్ అనారోగ్యం పాలవగా, ఆమెకు ‘యురేమియా’ అనే తీవ్రమైన వ్యాధి ఉందని తేలింది. బ్రతకాలంటే వారానికి మూడుసార్లు డయాలసిస్ చేయించుకోవాలని డాక్టర్లు చెప్పారు.
ఈ చికిత్స కోసం నెలకు 5,000 యువాన్ల (సుమారు 70,000 రూపాయలకు పైగా) ఖర్చు అయ్యేది, అది ఆ పేద కుటుంబానికి భారమైంది. ఉన్న సొమ్ము మొత్తం అయిపోయింది. ప్రభుత్వ సాయం కోసం లియావో ఎంతో ప్రయత్నించారు, కానీ బీజింగ్ లోకల్ రెసిడెంట్ కార్డ్ లేకపోవడంతో ఆ భార్యకు ప్రభుత్వ సాయం నిరాకరించబడింది.
ఒకరోజు ఆసుపత్రిలో బిల్లు చెల్లిస్తుండగా, సిబ్బంది రశీదుపై ఉన్న స్టాంపును మాత్రమే చూస్తున్నారని, కంప్యూటర్ రికార్డులను తనిఖీ చేయడం లేదని లియావో గమనించారు. తన భార్య కళ్లముందే చనిపోతుంటే చూడలేక, లియావో ఒక సాహసోపేతమైన నిర్ణయం తీసుకున్నారు. ఆసుపత్రి పేరుతో నకిలీ స్టాంపులు తయారు చేసి, నకిలీ రశీదులను సృష్టించడం మొదలుపెట్టారు. ఇది ఒకటో రెండో రోజులు కాదు, ఏకంగా 4 ఏళ్ల పాటు సాగింది. ఈలోగా భార్యకు చికిత్స కూడా కొనసాగింది.
కుంభకోణం ఎలా బయటపడింది? 2011లో ఆసుపత్రి తమ కంప్యూటర్ వ్యవస్థను అప్డేట్ చేసినప్పుడు, ఈ మోసం వెలుగులోకి వచ్చింది. లియావో దాదాపు 1.72 లక్షల యువాన్ల (సుమారు 24.22 లక్షల రూపాయలు) విలువైన 49 నకిలీ రశీదులను సమర్పించాడని విచారణలో తేలింది. కేసు కోర్టుకు చేరగా, న్యాయమూర్తి ముందు లియావో కన్నీరుమున్నీరయ్యారు. “నేను నిస్సహాయుడిని. నా భార్యను బ్రతికించుకోవడం తప్ప నాకు వేరే మార్గం లేదు” అని తన ఆవేదనను వెళ్లగక్కారు.
చట్టంపై గెలిచిన మానవత్వం: ఈ కథ మీడియాకు తెలియడంతో, చైనావ్యాప్తంగా ప్రజలు స్పందించారు. పేదల కోసం ఆరోగ్య వ్యవస్థ సులభంగా ఉంటే, ఒక భర్త నేరస్థుడు కావాల్సిన అవసరం ఉండేది కాదని సోషల్ మీడియాలో చర్చ మొదలైంది. లియావో పరిస్థితి చూసి ప్రజలు ఉదారంగా సహాయం చేశారు. కొద్ది రోజుల్లోనే 5 లక్షల యువాన్ల విరాళం సేకరించారు. ఆ డబ్బుతో లియావో ఆసుపత్రి బాకీని చెల్లించారు. 2012లో కోర్టు కూడా అతని పరిస్థితిని అర్థం చేసుకుని, జైలుకు పంపే బదులు, ఇంట్లోనే ఉండి భార్యను చూసుకునేలా శిక్షను విధించింది.
కథకు విషాద ముగింపు: భార్య ప్రాణాలను కాపాడటానికి లియావో ఎంతగానో పోరాడారు, కానీ 2016లో మల్టిపుల్ ఆర్గాన్ ఫెయిల్యూర్ కారణంగా డూ జిన్లింగ్ మరణించారు. అయితే, ఈ ఘటన తర్వాత చైనా ప్రభుత్వం తమ వైద్య విధానంలో పెద్ద మార్పులు చేసింది, దీనివల్ల నేడు లక్షలాది మంది రోగులకు ప్రయోజనం చేకూరుతోంది.