11 వేలకు పైగా పాటలు పాడి ప్రపంచ రికార్డు సృష్టించిన లెజెండరీ సింగర్ ఆశా భోస్లే ఇక లేరు. ఆమె పాడిన పాటలు ఇప్పటికీ శ్రోతలను మంత్రముగ్ధులను చేస్తూనే ఉన్నాయి. వైవిధ్యమైన గానంతో దశాబ్దాల పాటు అలరించిన ఆశా తాయి, తన 92 ఏళ్ల వయసులోనూ గొంతులో అదే మ్యాజిక్‌ను కాపాడుకున్నారు. ప్రస్తుతం ఆమె పాడిన ఆఖరి వీడియో సోషల్ మీడియాలో కన్నీళ్లు పెట్టిస్తోంది.
ఆశిష్ షెలార్ భావోద్వేగ నివాళి
కొద్దిరోజుల క్రితమే బీజేపీ నేత ఆశిష్ షెలార్ ఆశా భోస్లేను కలిశారు. ఆ సమయంలో ఆమె ఎంతో ఉత్సాహంగా పాట పాడారు. ఆశా తాయి నిధనం తర్వాత, షెలార్ ఆ వీడియోను షేర్ చేస్తూ అత్యంత భావోద్వేగానికి లోనయ్యారు. “నా జీవితంలోని అసలైన సంపదను కోల్పోయాను” అంటూ ఆయన నివాళులర్పించారు.
“కష్టాలను సైతం చిరునవ్వుతో పాటలుగా మార్చిన శక్తి ఆమె.. జయ శారదే.. వాగేశ్వరి అంటూ ప్రార్థించిన స్వరమది. లావణి, భక్తి గీతాలు, అభంగాలు, సినీ గీతాలు.. ఇలా ఏ ప్రక్రియ అయినా ఆమె గొంతులో అద్భుతంగా పలికేది. 20కి పైగా భాషల్లో పాడి భాషా ఎల్లలు చెరిపేసిన ధీశాలి. సొంత జీవితంలోని కష్టాలను ఎదిరించి నిలబడ్డారు. సాక్షాత్తు సరస్వతీ దేవి వీణానాదం నేడు మూగబోయింది.” అని షెలార్ పేర్కొన్నారు.
తనను సొంత తమ్ముడిలా ప్రేమించిన అక్కను కోల్పోవడం మాటల్లో చెప్పలేని ఆవేదన అని ఆయన ఆవేదన వ్యక్తం చేశారు. ఆ వీడియోలో ఆశా భోస్లే “బ్రహ్మ విష్ణు అని మహేష్ సామోరి బసలే…” (దత్తాత్రేయ భక్తి గీతం) పాడుతూ కనిపిస్తున్నారు.
ఆశా భోస్లే చివరి గీతం
తన సుదీర్ఘ ప్రయాణంలో వేల పాటలు పాడిన ఆశా తాయి, 2026లో తన చివరి పాటను రికార్డ్ చేశారు. అంతర్జాతీయ బ్యాండ్ ‘గొరిల్లాజ్’ (Gorillaz) తో కలిసి ‘ద షాడో లైట్’ అనే ఆల్బమ్ కోసం ఆమె గొంతు సవరించారు. జేమ్స్ ఫోర్డ్, శామ్యూల్ ఎగ్లంటన్ వంటి దిగ్గజాలు నిర్మించిన ఈ పాటలో ఆమె తన అద్భుతమైన గాత్రాన్ని వినిపించారు. డేమన్ అల్బర్న్, కౌసర్ మునీర్ రాసిన ఈ పాట ప్రస్తుతం యూట్యూబ్‌లో అందుబాటులో ఉంది.
ఒక శకం ముగిసింది, కానీ ఆమె స్వరం అమరం!