“ఆసుపత్రిలోనే ఇంత అరాచకమా..?” రోగులను పట్టించుకోవాల్సిన వారే వైన్ షాప్‌లా మార్చేశారు.. ప్రాణాలు కాపాడాల్సిన చోట దొంగచాటుగా మందు విందు; వైరల్ వీడియోతో బట్టబయలు!

బీహార్‌లోని దర్భంగా మెడికల్ కాలేజ్ హాస్పిటల్‌లో (DMCH) రోగులకు సేవలందించాల్సిన బాధ్యతాయుత స్థానంలో ఉన్న సిబ్బంది, ఏకంగా డ్యూటీ సమయంలోనే మద్యం సేవించినట్లు చూపుతున్న ఓ షాకింగ్ వీడియో సోషల్ మీడియాలో విడుదలై తీవ్ర కలకలం రేపింది.

నెట్టింట వైరల్ అవుతున్న ఆ వీడియోలో.. కొందరు మహిళా సిబ్బంది తమ బ్యాగుల నుంచి తినుబండారాలు, ప్లాస్టిక్ గ్లాసులను బయటకు తీస్తుండగా, ఓ పురుష ఉద్యోగి తన నడుము భాగంలో దాచి ఉంచిన టెట్రా ప్యాక్ (Tetra Pack) మద్యాన్ని తీసి వారికి ఇవ్వడం స్పష్టంగా రికార్డైంది.

ఆసుపత్రిలోని సర్జికల్ ఓపీడీ (OPD) మెట్ల సమీపంలో ఈ తతంగం నడిచినట్లు సమాచారం. ఆసుపత్రిలో ఔట్‌సోర్సింగ్ పద్ధతిలో తాత్కాలికంగా పనిచేస్తున్న ట్రాలీమ్యాన్, ప్రైవేట్ ఏజెన్సీకి చెందిన మహిళా సిబ్బంది ఈ దుశ్చర్యకు పాల్పడినట్లు తెలిసింది.

ఈ వ్యవహారం వెలుగులోకి రాగానే సంబంధిత ఏజెన్సీ వారిని వెంటనే విధుల నుంచి తొలగించినట్లు తెలిపినప్పటికీ, వారు మళ్లీ విధుల్లోకి చేరినట్లు వార్తలు వస్తుండటంతో ఆసుపత్రి యాజమాన్యంపై తీవ్ర విమర్శలు వెల్లువెత్తుతున్నాయి.

మరోవైపు, ఈ ఘటనపై ట్రాలీమ్యాన్ సూపర్‌వైజర్ రమణ్ సింగ్ మాట్లాడుతూ.. వీడియోలో కనిపిస్తున్న వారిని కొన్ని నెలల క్రితమే విధుల నుంచి తొలగించామని పేర్కొన్నారు. అయితే ఉన్నతాధికారుల సమగ్ర దర్యాప్తు తర్వాతే అసలు నిజాలు బయటపడటంతో పాటు బాధ్యులపై చర్యలు వెల్లడయ్యే అవకాశం ఉంది.