మహారాష్ట్రలోని నాగ్పూర్లో, ముప్పై నిమిషాలకు పైగా బహిరంగంగా ప్రజల సమక్షంలోనే సాగిన కిరాతక హింసాకాండ ఆ ప్రాంతం మొత్తాన్ని తీవ్ర భయాందోళనలకు గురిచేసింది.
నాగ్పూర్లోని రద్దీగా ఉండే ఓ వీధిలో, ఇద్దరు పేరుమోసిన రౌడీల మధ్య చెలరేగిన తీవ్ర వివాదం.. పదునైన ఆయుధాలతో ఒకరిపై ఒకరు విచక్షణారహితంగా దాడులు చేసుకునే స్థాయికి దారితీసింది.
నడిరోడ్డుపై అమానుషంగా సాగిన ఈ రక్తపుటేరుల దృశ్యాలు అక్కడున్న బాటసారులను, వ్యాపారులను తీవ్ర దిగ్భ్రాంతికి గురిచేయడమే కాకుండా, శాంతిభద్రతల పరిస్థితిపై పెను ప్రశ్నలను లేవనెత్తాయి.
ఈ దారుణ ఘటన నేపథ్యాన్ని పరిశీలిస్తే, ‘ముక్కోణపు ప్రేమకథ’తో పాటు వారి మధ్య ఉన్న పాత కక్షలే ఈ ఘర్షణకు ప్రధాన కారణమని వెల్లడైంది. దాడికి పాల్పడిన వ్యక్తి, ప్రత్యర్థిని వెంటాడి వేటాడుతూ విచక్షణారహితంగా నరికాడు.
అతను వేసుకున్న తెల్ల చొక్కా మొత్తం రక్తసిక్తమయ్యే వరకు, బాధితుడు ప్రాణభయంతో కేకలు వేస్తూ పారిపోతున్నప్పటికీ.. వదలకుండా వెంబడించి మరీ మళ్లీ మళ్లీ దాడి చేసిన తీరు చూసేవారి గుండెల్ని పిండేసింది.
దాదాపు అరగంటకు పైగా రద్దీగా ఉండే ప్రాంతంలో ఇంతటి విధ్వంసం జరుగుతున్నప్పటికీ, ప్రాణభయంతో ఎవరూ అడ్డుకునే సాహసం చేయలేకపోయారు. సమాచారం అందుకున్న పోలీసులు హుటాహుటిన ఘటనా స్థలానికి చేరుకుని, తీవ్రంగా గాయపడిన వ్యక్తిని ఆసుపత్రికి తరలించారు. అనంతరం కేసు నమోదు చేసుకుని పోలీసులు ముమ్మరంగా దర్యాప్తు చేస్తున్నారు.