హుబ్బళ్ళి, కర్ణాటక: నగరంలోని నేకార్ నగర్, శివనాగర లేఅవుట్‌లో ఒక కుటుంబం ఇల్లు నిర్మించుకోవడానికి మున్సిపల్ కార్పొరేషన్ నుండి అనుమతి పొంది భవనాన్ని నిర్మించింది. హిందువులు ఎక్కువగా నివసించే ఆ ప్రాంతంలో ముస్లిం కుటుంబం ఇల్లు కట్టుకోవడంపై స్థానికులు మొదట ఎలాంటి అభ్యంతరం వ్యక్తం చేయలేదు.
అయితే, ఇల్లు కట్టిన వారు అక్కడ నివసించకుండా, ఆ భవనాన్ని మసీదుగా (Mosque) మార్చారు. ఇంటి ముందే మసీదును ఏర్పాటు చేసి, ప్రతిరోజూ వందలాది మంది నమాజ్ చేయడం ప్రారంభించారు. ఇది స్థానిక హిందువుల ఆగ్రహానికి కారణమైంది. నిబంధనలకు విరుద్ధంగా నిర్మించిన ఈ మసీదును తక్షణమే తొలగించాలని డిమాండ్ చేస్తూ ఈరోజు భారీ ఎత్తున నిరసన (Protest) చేపట్టారు.
అసలేం జరిగిందంటే?
హుబ్బళ్ళి నగరంలోని నేకార్ నగర్, శివనాగర లేఅవుట్, ఛబ్బీ ప్లాట్ వంటి ప్రాంతాల్లో 95 శాతానికి పైగా హిందువులే నివసిస్తున్నారు. అయితే, ఇదే ప్రాంతానికి ఆనుకుని ఉన్న ఒక ప్లాట్‌లో జహీర్ సారవాడ్, జాకీర్ సారవాడ్ అనే సోదరులు ఇల్లు నిర్మించుకున్నారు. ఇతర మతస్థులు అక్కడ ఇల్లు కట్టుకుని నివసించడం పట్ల స్థానికులకు ఎలాంటి ఇబ్బంది కలగలేదు. కానీ, ఆ సోదరులు అక్కడ నివసించకుండా రహస్యంగా మసీదును ఏర్పాటు చేశారు.
మున్సిపల్ కార్పొరేషన్ నుండి కేవలం నివాస గృహం కోసమే అనుమతి పొంది, అక్కడ ప్రార్థనా మందిరాన్ని నిర్మించడంపై స్థానికులు మండిపడుతున్నారు. ఇప్పటికే ఆ చుట్టుపక్కల మూడు మసీదులు ఉన్నాయని, ఇప్పుడు అక్రమంగా ఇంటిని మసీదుగా మార్చి రోజుకు 50 నుండి 100 మంది నమాజ్ చేయడం శాంతి భద్రతలకు విఘాతమని వారు ఆరోపిస్తున్నారు.
పోలీసుల జోక్యం.. కొనసాగుతున్న ఉద్రిక్తత
గత ఐదు, ఆరు నెలలుగా స్థానికులకు మరియు సారవాడ్ కుటుంబ సభ్యులకు మధ్య ఈ విషయంలో గొడవలు జరుగుతున్నాయి. ఈ వివాదం పాత హుబ్బళ్ళి పోలీస్ స్టేషన్‌కు కూడా చేరింది. పోలీసులు ఇరువర్గాలను పిలిపించి శాంతిభద్రతలకు విఘాతం కలిగించవద్దని హెచ్చరించారు. అయినప్పటికీ, అక్కడ ప్రార్థనలు కొనసాగడంతో హిందూ సంఘాలు పోరాటానికి పిలుపునిచ్చాయి. ఈ నేపథ్యంలో నేకార్ నగర్‌లోని బసవేశ్వర సర్కిల్ వద్ద వందలాది మంది నిరసనకారులు గుమిగూడారు.
మసీదును తొలగించకపోతే ఉద్యమిస్తాం: ప్రమోద్ ముతాలిక్
నిరసనల నేపథ్యంలో నేకార్ నగర్ మరియు మసీదు ప్రాంతంలో వందకు పైగా పోలీసులను మోహరించారు. బారికేడ్లు ఏర్పాటు చేసి ఆ ప్రాంతంలోకి ఎవరూ వెళ్లకుండా నిషేధం విధించారు. ఈ నిరసనలో శ్రీరామసేన వ్యవస్థాపక అధ్యక్షుడు ప్రమోద్ ముతాలిక్ పాల్గొన్నారు.
ఆయన మాట్లాడుతూ.. “ఇల్లు కడతామని చెప్పి అక్రమంగా మసీదు నిర్మించారు. చుట్టుపక్కల మూడు మసీదులు ఉన్నా, ఇక్కడ నిబంధనలకు విరుద్ధంగా మరోటి కట్టారు. మేము ఎక్కడైనా ప్రార్థనలు చేసినా, దేవాలయాలు కట్టినా కేసులు పెట్టి తొలగిస్తారు. కానీ అనుమతి లేకుండా మసీదు కట్టినా ఎందుకు చర్యలు తీసుకోవడం లేదు?” అని ప్రశ్నించారు. వారం రోజుల్లోగా ఆ మసీదును తొలగించకపోతే తీవ్రస్థాయిలో పోరాటం చేస్తామని ఆయన హెచ్చరించారు.
గురువారం నాడు మున్సిపల్ మేయర్ మరియు అధికారులు ఘటనా స్థలాన్ని సందర్శించి పరిశీలించారు. అక్రమ నిర్మాణం తొలగింపునకు గడువు విధించారు. హిందువులు అధికంగా ఉన్న ప్రాంతంలో మసీదు నిర్మాణం ఇప్పుడు తీవ్ర చర్చనీయాంశంగా మారింది.