సొంత ఇల్లు ఉన్నా, ఇంటి ముందు కారు ఆపుకోవాలన్నా భయపడాల్సిన పరిస్థితి. ఈ రోజుల్లో ఇంటి ముందు పార్కింగ్ విషయంలో గొడవలు జరగడం సర్వసాధారణమైపోయింది. చాలా సందర్భాల్లో ఈ గొడవలు సోషల్ మీడియాలో వైరల్ అవుతూనే ఉన్నాయి. అయితే, ఇలాంటి సమయంలో ఆవేశపడి కొట్టుకోవడం కంటే, అసలు చట్టం ఏం చెబుతుందో తెలుసుకుని ముందుకు వెళ్లడం శ్రేయస్కరం.
రోడ్డు ప్రభుత్వ ఆస్తి.. కానీ ‘రైట్ ఆఫ్ వే’ మీ హక్కు!
చట్టప్రకారం రోడ్డు అనేది ప్రభుత్వ ఆస్తి. కాబట్టి, కేవలం “నా ఇంటి ముందు ఖాళీగా ఉంది” అన్న కారణంతో ఎవరినీ పార్కింగ్ చేయకుండా పూర్తిగా అడ్డుకునే అధికారం ఎవరికీ లేదు. అయితే, ప్రతి వ్యక్తికీ తన ఇంటిలోకి ఎటువంటి ఆటంకం లేకుండా వెళ్లడానికి మరియు రావడానికి ‘రైట్ ఆఫ్ వే’ (Right of Way) అనే కీలక హక్కు ఉంటుంది.
గేటు ముందు పార్కింగ్ చేస్తే కఠిన చర్యలు
ఎవరైనా తమ వాహనాన్ని మీ ఇంటి మెయిన్ గేటుకు అడ్డంగా పార్క్ చేసి, మీ రాకపోకలకు ఆటంకం కలిగిస్తే అది చట్టవిరుద్ధం. ఇటువంటి సందర్భాల్లో:
- భారతీయ న్యాయ సంహిత (BNS) 2023 లోని సెక్షన్ 126 (Wrongful Restraint) కింద చర్యలు తీసుకోవచ్చు.
- మోటార్ వాహనాల చట్టం, 1988 ప్రకారం కూడా ఇది నేరం.
ఇలాంటి పరిస్థితి ఎదురైనప్పుడు మీరు ట్రాఫిక్ పోలీసులకు సమాచారం అందించవచ్చు. సంబంధిత వాహన యజమానికి జరిమానా విధించడమే కాకుండా, పోలీసులు ఆ వాహనాన్ని అక్కడి నుండి టో (Tow) చేసి తరలించే అవకాశం ఉంది.
ట్రాఫిక్ ఇబ్బందులు కలిగించినా ఫిర్యాదు చేయవచ్చు
వాహనం నేరుగా గేటు ముందు లేకపోయినా, రోడ్డుపై పార్క్ చేసిన తీరు వల్ల ట్రాఫిక్ జామ్ అవుతున్నా, అనవసరపు హారన్ల వల్ల శబ్ద కాలుష్యం ఏర్పడుతున్నా లేదా ప్రజలకు అసౌకర్యం కలిగించినా ఫిర్యాదు చేయవచ్చు.
- ఇలాంటి ఘటనలు ‘పబ్లిక్ న్యూసెన్స్’ కిందకు వస్తాయి.
- వీటిపై భారతీయ నాగరిక సురక్ష సంహిత 2023 లోని సెక్షన్ 152 కింద చర్యలు తీసుకోవడానికి ఆస్కారం ఉంది.
ఫిర్యాదు చేయడం ఎలా?
మీకు ఇబ్బంది కలిగినప్పుడు ఈ క్రింది మార్గాలను అనుసరించండి:
- వెంటనే ట్రాఫిక్ పోలీసులకు ఫోన్ చేసి సమాచారం ఇవ్వండి.
- సమీపంలోని పోలీస్ స్టేషన్‌లో ఫిర్యాదు చేయండి.
- అవసరమైతే వాహనాన్ని టో చేసి తొలగించమని పోలీసులను కోరండి.
హెచ్చరిక: ఈ పనులు చేస్తే మీరే బుక్కవుతారు!
కోపంలో చేసే కొన్ని పనులు మిమ్మల్ని రివర్స్‌లో ఇబ్బందుల్లో పడేస్తాయి.
- వేరొకరి కారును ధ్వంసం చేయడం.
- టైర్లలో గాలి తీయడం లేదా పంక్చర్ చేయడం.
- బలవంతంగా వాహనాన్ని పక్కకు నెట్టడం.
- పబ్లిక్ రోడ్డుపై ‘ప్రైవేట్ పార్కింగ్’ అని బోర్డులు పెట్టడం.
ఇలాంటి పనులు చట్టవిరుద్ధం. మీరు ఇలా చేస్తే, ఎదుటివారి కంటే ముందు మీపైనే పోలీసులు చట్టపరమైన చర్యలు తీసుకునే అవకాశం ఉంటుంది. కాబట్టి సంయమనంతో, చట్టబద్ధంగా వ్యవహరించండి.