వాషింగ్టన్: వెనిజులా అధ్యక్షుడు నికోలస్ మదురోను అమెరికా సైన్యం అదుపులోకి తీసుకున్న వెంటనే, కొలంబియా, క్యూబా, మెక్సికో, ఇరాన్ మరియు గ్రీన్లాండ్ వంటి దేశాలకు అమెరికా అధ్యక్షుడు డోనాల్డ్ ట్రంప్ తీవ్ర హెచ్చరికలు జారీ చేశారు. అమెరికా ప్రయోజనాలను కాపాడటం మరియు పశ్చిమ దేశాల్లో తన ఆధిపత్యాన్ని చాటుకోవడమే లక్ష్యంగా ట్రంప్ ఈ అడుగు వేశారు.
మదురోను బంధించిన తర్వాత ట్రంప్ స్పందిస్తూ.. అమెరికా చుట్టుపక్కల ఉన్న దేశాలు శాంతియుతంగా ఉండాలని, అక్కడి చమురు నిల్వలు స్వేచ్ఛగా అందుబాటులో ఉండాలని ఆశిస్తున్నట్లు తెలిపారు. పశ్చిమ దేశాల్లో అమెరికా ఆధిపత్యాన్ని ఎవరూ ప్రశ్నించలేరని ఆయన స్పష్టం చేశారు.
ట్రంప్ హెచ్చరించిన దేశాలు ఇవే:
- గ్రీన్లాండ్: అమెరికా భద్రతకు గ్రీన్లాండ్ అత్యంత కీలకమని, అక్కడ రష్యా, చైనా నౌకల సంచారాన్ని డెన్మార్క్ అడ్డుకోలేకపోతోందని ట్రంప్ ఆందోళన వ్యక్తం చేశారు.
- క్యూబా: వెనిజులా మిత్రదేశమైన క్యూబాలో సైనిక జోక్యం అవసరం లేదని, ఆ ప్రభుత్వం తనంతట తానుగా కుప్పకూలుతుందని ట్రంప్ వ్యాఖ్యానించారు.
- ఇరాన్: ప్రభుత్వ వ్యతిరేక నిరసనకారులపై దాడి చేస్తే అమెరికా సైన్యం రంగంలోకి దిగుతుందని, అణు ప్రాజెక్టుల పునరుద్ధరణకు ప్రయత్నిస్తే ధ్వంసం చేస్తామని హెచ్చరించారు.
- కొలంబియా, మెక్సికో: అమెరికాలోకి మాదకద్రవ్యాల సరఫరాను అడ్డుకోవడంలో విఫలమైతే తామే నేరుగా జోక్యం చేసుకుంటామని ట్రంప్ హెచ్చరించారు.
మదురో అరెస్ట్ వెనుక పెద్ద కుట్ర? అత్యంత భద్రత కలిగిన అధ్యక్ష భవనంలోకి అమెరికా సైన్యం ప్రవేశించి మదురోను, ఆయన భార్యను అపహరించుకుపోతున్నా వెనిజులా సైన్యం మౌనంగా ఉండటం వెనుక పెద్ద మిస్టరీ దాగి ఉంది. ఈ లొంగుబాటు వెనుక వెనిజులా వైస్ ప్రెసిడెంట్ డెల్సీ రోడ్రిగ్స్ ఉన్నట్లు సమాచారం. అమెరికా హెలికాప్టర్లను కనీసం తుపాకులతో కూడా ఎదురించకుండా సైన్యం మిన్నకుండిపోయింది.
ట్రంప్ ప్రభుత్వంతో డెల్సీ రోడ్రిగ్స్ మరియు ఆమె సోదరుడు చేసుకున్న రహస్య ఒప్పందం వల్లే మదురోను అమెరికాకు అప్పగించినట్లు రక్షణ రంగ నిపుణులు భావిస్తున్నారు. ఈ ఒప్పందం ప్రకారం, మదురోను పదవి నుంచి తొలగించి, డెల్సీ రోడ్రిగ్స్‌ను వెనిజులా మధ్యంతర అధ్యక్షురాలిగా ట్రంప్ గుర్తించారు. మదురో పట్టుబడిన వెంటనే ఆమె బాధ్యతలు చేపట్టడం ఈ అనుమానాలకు బలం చేకూరుస్తోంది.