ఇక పాకిస్తాన్ పూర్తి కంట్రోల్ ఆర్మీ చేతుల్లోనే..! అసిమ్ మునీర్‌కు అత్యున్నత అధికారాలు.. మరి ప్రధాని డమ్మీ అయిపోయారా..? ఆ ఒక్క విషయంలో మాత్రమే ఆయనకు అధికారమట..!

పాకిస్తాన్ రాజకీయాల్లో ఆ దేశ ఆర్మీ చీఫ్ జనరల్ అసిమ్ మునీర్ అధికారం మరింత విస్తరించనుంది.

పాకిస్తాన్‌లో ‘చీఫ్ ఆఫ్ డిఫెన్స్ ఫోర్సెస్’ (CDF) పదవికి రాజ్యాంగ హోదా కల్పించే సరికొత్త బిల్లును ఆ దేశ పార్లమెంట్‌లో ప్రవేశపెట్టనున్నారు.

పాకిస్తాన్ ఫెడరల్ క్యాబినెట్ కొత్త ‘డిఫెన్స్ ఫోర్సెస్ యాక్ట్-2026’ ముసాయిదాకు, అలాగే ‘నేషనల్ కమాండ్ అథారిటీ యాక్ట్-2010’ (NCA) సవరణలకు ఆమోదం తెలిపింది. ఈ కొత్త మార్పుల ద్వారా పాకిస్తాన్ అణ్వాయుధ వ్యవస్థ, సమగ్ర సైనిక కార్యకలాపాలపై సీడీఎఫ్ హోదాలో ఉండే అసిమ్ మునీర్ ప్రత్యక్ష ఆధిపత్యం మరింత బలపడనుంది. అయినప్పటికీ, అణ్వాయుధాలను ప్రయోగించే అంతిమ నిర్ణయాధికారం మాత్రం ప్రధాని వద్దే కొనసాగుతుంది.

ఈ కొత్త చట్టం ద్వారా CDF పదవి, దాని ప్రధాన కార్యాలయ అధికారాలు, పరిపాలనా నిర్మాణం మరియు త్రివిధ దళాల సమన్వయం కోసం సమగ్ర చట్టపరమైన నిబంధనలు అమల్లోకి వస్తాయి. గతంలో ఉన్న ‘చైర్మన్ ఆఫ్ జాయింట్ చీఫ్స్ ఆఫ్ స్టాఫ్ కమిటీ’ స్థానంలో CDF కింద త్రివిధ దళాల సమన్వయం మరింత కేంద్రీకృతం కానుంది.

క్లిష్ట సమయాల్లో అణ్వాయుధాల వినియోగానికి సంబంధించిన నిర్ణయాల్లో నేషనల్ కమాండ్ అథారిటీ ప్రధానంగా ఉన్నప్పటికీ, సైనికపరమైన వ్యూహాల్లో CDF మరియు కొత్తగా ఏర్పాటు చేసిన ‘నేషనల్ స్ట్రాటజిక్ కమాండ్’ చీఫ్ పాత్ర అత్యంత కీలకమైనదిగా మారనుంది. ఈ రెండు బిల్లులు పాకిస్తాన్ పార్లమెంట్‌లోని ఉభయ సభలలో ఆమోదం పొందితే, ఆ దేశ సమగ్ర రక్షణ, సైనిక వ్యవస్థలపై అసిమ్ మునీర్ పట్టు తిరుగులేని విధంగా మరింత పటిష్టం కానుంది.