ఇంగ్లాండ్‌లోని నాటింగ్‌హామ్‌ సమీపంలో ఉన్న లాంగర్ ఎయిర్‌ఫీల్డ్ ప్రాంతంలో స్కైడైవింగ్ సాహసం చేయడానికి పలువురు గుమిగూడారు.
అక్కడి డెవాన్ ప్రాంతానికి చెందిన 35 ఏళ్ల హాలీ విఫెన్ అనే మహిళ తన స్నేహితులతో కలిసి సుమారు 12,000 అడుగుల ఎత్తులో విమానం నుండి కిందకు దూకి సాహసాన్ని ప్రారంభించింది. అంతా అనుకున్నట్లుగానే గాల్లో ఎగురుతున్న సమయంలో, ఊహించని విధంగా తోటి స్కైడైవర్ కాలు బలంగా హాలీ తలకు తగిలింది.
ఈ తీవ్రమైన తాకిడికి గురైన హాలీ, గాల్లో ఉండగానే ఒక్కసారిగా స్పృహ కోల్పోయింది. ఆ తర్వాత గంటకు దాదాపు 150 కిలోమీటర్ల వేగంతో నేల వైపు దూసుకుపోతూ కింద పడటం ప్రారంభించింది. ఆమెతో వచ్చిన స్నేహితులు గాల్లోనే ఆమెను కాపాడటానికి ప్రయత్నించినప్పటికీ, దురదృష్టవశాత్తు ఎవరూ ఆమెను పట్టుకోలేకపోయారు. చావు అంచులకు చేరుకున్న ఆ మహిళ జీవితంలో ప్రకృతి ఒక అద్భుతాన్ని సృష్టించింది.
నేలపై దట్టంగా పెరిగిన ఒక చెట్టుపై ఆమె పడటమే ఆమె ప్రాణాలను నిలబెట్టింది. చెట్టు కొమ్మలు ఆమె పడే వేగాన్ని గణనీయంగా తగ్గించడంతో, ఆమె అదృష్టవశాత్తూ మృత్యువు నుండి తప్పించుకుంది. ఈ ఘోర ప్రమాదంలో ఆమె వెన్నెముక విరిగి, కాళ్లకు తీవ్ర గాయాలయ్యాయి. అయినప్పటికీ, మృత్యువు అంచుల దాకా వెళ్లి ప్రాణాలతో బయటపడిన ఆమె.. తాను పూర్తిగా కోలుకున్న తర్వాత మళ్లీ స్కైడైవింగ్ చేస్తానని ధైర్యంగా చెప్పడం అందరినీ ఆశ్చర్యానికి గురిచేస్తోంది.