“ఇదేందయ్యా ఇది.. ఇది స్పెల్లింగ్ మిస్టేక్ కాదంట! నిజమైన పేరంట!”.. చైనాలో వైరల్ అవుతున్న వింత పెళ్లి పత్రిక.. వివరణ ఇచ్చిన చైనా జంట!

చైనాలో జరగబోయే ఒక వింత వివాహానికి సంబంధించిన వార్త ప్రస్తుతం గ్లోబల్ సోషల్ మీడియాలో విపరీతంగా వైరల్ అవుతోంది.

ఒకే పేరుతో వరుడు, వధువు!
సాధారణంగా పెళ్లి శుభలేఖల్లో వరుడు, వధువు పేర్లు వేర్వేరుగా ఉండటం సహజం. కానీ ఈ జంట పెళ్లి పత్రికలో మాత్రం ఇద్దరి పేర్లూ పూర్తిగా ఒకేలా ముద్రించి ఉండటం అందరినీ తీవ్ర ఆశ్చర్యానికి గురిచేస్తోంది.

చైనాకు చెందిన 33 ఏళ్ల ‘సు జియావోకాంగ్’ అనే పురుషుడు, 28 ఏళ్ల ‘సు జియావోకాంగ్’ అనే మహిళ ఒకరినొకరు ప్రేమించుకుని పెళ్లి చేసుకోవాలని నిర్ణయించుకున్నారు. విశేషమేమిటంటే.. వీరిద్దరి పేర్లు ఒకటే కావడమే కాకుండా, ఇద్దరూ ఒకే రకమైన వృత్తిలోనే పనిచేస్తుండటం గమనార్హం! దీంతో ప్రారంభంలో ఈ పెళ్లి పత్రిక చూసిన చాలామంది ఇది ప్రింటింగ్ ప్రెస్‌లో జరిగిన స్పెల్లింగ్ మిస్టేక్ (Typing Mistake) అని భావించారు.

నెట్టింట హల్‌చల్ చేస్తున్న వింత వెడ్డింగ్ కార్డ్
అయితే ఇది ఎలాంటి ప్రింటింగ్ పొరపాటు కాదని, యాదృచ్ఛికంగా ఇద్దరి పేర్లూ ఒకటేనని నిజం తెలిశాక నెటిజన్లు ఆశ్చర్యపోతూ ఈ జంటకు అభినందనలు తెలుపుతున్నారు. ఒకే పేరు, ఒకే వృత్తి ఉన్న ఈ విచిత్రమైన జంట పెళ్లి పత్రిక ప్రస్తుతం ఇంటర్నెట్‌లో హాట్ టాపిక్‌గా మారింది.