సోషల్ మీడియా (Social Media) ప్రేమ కోసం సరిహద్దులు దాటి భారతదేశానికి (India) వచ్చే ఘటనలు ఆగడం లేదు. తాజాగా ఇటువంటి సంచలన ఘటన మహారాష్ట్ర జలగావ్లో వెలుగుచూసింది. ఇన్స్టాగ్రామ్లో పరిచయమైన వ్యక్తి కోసం ఒక బంగ్లాదేశీ యువతి ఎటువంటి అనుమతులు లేకుండా భారత్లోకి ప్రవేశించింది. అయితే, జలగావ్లోని శనిపేట పోలీసులు (Police) ఆమెను కనిపెట్టి అరెస్ట్ చేశారు. ఆమెకు ఆశ్రయం ఇచ్చిన యువకుడిపై కూడా కేసు నమోదు చేశారు.
రహస్య సమాచారంతో పోలీసుల దాడి
జలగావ్ నగరంలోని భోయ్ గల్లీ, జోషి పేట ప్రాంతంలో ఒక విదేశీ మహిళ ఎటువంటి అనుమతి లేకుండా నివసిస్తున్నట్లు శనిపేట పోలీసులకు రహస్య సమాచారం అందింది. ఈ సమాచారం ఆధారంగా పోలీసులు అనుమానిత ప్రదేశంపై దాడి చేయగా, కోణికా రాణి శ్యామలచంద్ర రాయ్ (20) అనే బంగ్లాదేశీ యువతి దొరికింది. విచారణలో ఆమె వద్ద ఎటువంటి చెల్లుబాటు అయ్యే పాస్పోర్ట్ లేదా వీసా లేవని తేలింది.
ఇన్స్టాగ్రామ్లో చిగురించిన ప్రేమ
పోలీసుల ప్రాథమిక విచారణలో విస్తుపోయే విషయాలు తెలిశాయి. జలగావ్కు చెందిన బంగారు పని చేసే చిన్మయ్ జగన్నాథ్ వాలా, కోణికా రాణికి ఇన్స్టాగ్రామ్లో పరిచయం ఏర్పడింది. అది కాస్తా ప్రేమగా మారింది. చిన్మయ్ను పెళ్లి చేసుకోవాలనే ఉద్దేశంతో కోణిక ఎటువంటి చట్టపరమైన అనుమతులు లేకుండా బంగ్లాదేశ్ సరిహద్దు దాటి భారత్లోకి అడుగుపెట్టింది.
పెళ్లయిందని వాదన.. కానీ ఆధారాలు లేవు
పోలీసులు దాడి చేసిన సమయంలో కోణిక మరియు చిన్మయ్ ఇద్దరూ తమకు పెళ్లయిందని చెప్పారు. అయితే, వారి వద్ద వివాహానికి సంబంధించిన ఎటువంటి చట్టపరమైన ఆధారాలు లేదా అధికారిక పత్రాలు లేవు. అనుమతి లేకుండా భారత్లో నివసిస్తున్నందుకు కోణికను పోలీసులు అరెస్ట్ చేయగా, ఆమెకు ఆశ్రయం ఇచ్చినందుకు చిన్మయ్ వాలాపై కూడా కేసు నమోదు చేశారు.
కఠిన చట్టపరమైన చర్యలు
ఈ కేసులో శనిపేట పోలీసులు ఇమ్మిగ్రేషన్ చట్టం మరియు ఫారిన్ సిటిజన్స్ యాక్ట్ 2025 కింద కేసు నమోదు చేశారు. అసిస్టెంట్ పోలీస్ ఇన్స్పెక్టర్ సాజిద్ మన్సూరి ఈ కేసును దర్యాప్తు చేస్తున్నారు. ఈ యువతి సరిహద్దు దాటి భారత్కు ఎలా చేరుకుంది? దారిలో ఆమెకు ఎవరైనా సహాయం చేశారా? అనే కోణంలో పోలీసులు విచారణ జరుపుతున్నారు.