ఇరాక్లోని ఒక స్థానిక కాపరి ఒక అసాధారణ విషయాన్ని గమనించాడు. హెలికాప్టర్లు భూమికి దగ్గరగా ఎగురుతున్నాయి. పశ్చిమ ఎడారిలోని మారుమూల ప్రాంతంలో ఏదో వింత కార్యకలాపాలు జరుగుతున్నాయి.
ఇరాన్తో యుద్ధంలో సహాయపడటానికి ఇజ్రాయెల్ నిర్మించిన రహస్య స్థావరం వద్దకు తాను వచ్చానని ఆ కాపరి అప్పుడు ఊహించలేకపోయాడు.
వాల్ స్ట్రీట్ జర్నల్ (The Wall Street Journal) కథనం ప్రకారం, ఇరాన్పై గగనతల దాడులకు మద్దతుగా ఇజ్రాయెల్ ఇరాక్ ఎడారిలో ఒక సైనిక స్థావరాన్ని ఏర్పాటు చేసింది. యుద్ధం ప్రారంభానికి కొద్దిముందు ఈ స్థావరాన్ని నిర్మించారు. ఈ విషయం అమెరికాకు తెలుసు, కానీ ఇరాక్కు మాత్రం తెలియదు.
ఈ స్థావరంలో ఇజ్రాయెల్ స్పెషల్ ఫోర్సెస్ ఉన్నాయి. ఇది ఇజ్రాయెల్ వైమానిక దళానికి లాజిస్టికల్ హబ్గా పనిచేసింది. శత్రు భూభాగంలో ఇజ్రాయెల్ పైలట్లు ఎవరైనా కూల్చివేయబడితే, వారిని వెంటనే రక్షించడానికి ‘సెర్చ్ అండ్ రెస్క్యూ’ టీమ్లు కూడా ఇక్కడ మోహరించబడ్డాయి. ఇరాన్ ఇజ్రాయెల్ సరిహద్దు నుండి సుమారు 1,000 మైళ్ల దూరంలో ఉంటుంది. ఈ స్థావరం వల్ల ఆ దూరం గణనీయంగా తగ్గింది, దీనివల్ల టెల్ అవీవ్ దీర్ఘకాలిక వైమానిక కార్యకలాపాలను నిర్వహించడం సులభమైంది.
రహస్యం బయటపడే సమయం
మార్చి ప్రారంభంలో ఈ ఆపరేషన్ బయటపడే పరిస్థితి వచ్చింది. ఆ ప్రాంతంలో అసాధారణ సైనిక కార్యకలాపాలు జరుగుతున్నాయని ఒక కాపరి సమాచారం ఇచ్చినట్లు ఇరాక్ ప్రభుత్వ మీడియా నివేదించింది. దీనిని పరిశోధించడానికి ఇరాక్ సైన్యం తన బలగాలను పంపింది. వారు ఆ స్థావరాన్ని చేరుకోకుండా అడ్డుకోవడానికి ఇజ్రాయెల్ వైమానిక దాడులు జరిపింది, ఇందులో ఒక ఇరాక్ సైనికుడు మరణించగా, ఇద్దరు గాయపడ్డారు. ఇరాక్ మరో రెండు బృందాలను పంపగా, అక్కడ ఇటీవల సైనిక బలగాలు ఉన్నట్లు ఆధారాలు దొరికాయి.
ఇజ్రాయెల్ రహస్య స్థావరం ఉందని నిర్ధారించుకున్న తర్వాత, ఇరాక్ జాయింట్ ఆపరేషన్స్ కమాండ్ డిప్యూటీ కమాండర్ లెఫ్టినెంట్ జనరల్ కైస్ అల్-ముహమ్మదావి మాట్లాడుతూ.. “ఎటువంటి సమన్వయం లేదా అనుమతి లేకుండా ఈ దుస్సాహసానికి ఒడిగట్టారు. గగనతల మద్దతుతో ఒక విదేశీ సైనిక శక్తి ఇక్కడ కార్యకలాపాలు నిర్వహించినట్లు కనిపిస్తోంది” అని మండిపడ్డారు.
ఈ దాడికి అమెరికానే కారణమని భావిస్తూ ఇరాక్ ఐక్యరాజ్యసమితికి ఫిర్యాదు చేసింది. అయితే, ఆ దాడితో తమకు ఎటువంటి సంబంధం లేదని అమెరికా అధికారి ఒకరు ‘వాల్ స్ట్రీట్ జర్నల్’తో పేర్కొన్నారు. ఇరాక్ పశ్చిమ ఎడారి ప్రాంతం చాలా విశాలంగా, జనాభా లేకుండా ఉండటంతో రహస్య సైనిక కార్యకలాపాలకు అనువుగా ఉంటుంది. గతంలో 1991 మరియు 2003లో సద్దాం హుస్సేన్పై దాడుల సమయంలో కూడా అమెరికా దళాలు ఇదే ప్రాంతాన్ని ఉపయోగించుకున్నాయి.