మధ్యప్రాచ్యంలో ఇరాన్ మరియు అమెరికా-ఇజ్రాయెల్ యుద్ధం 19వ రోజున కూడా భీకరంగా కొనసాగుతోంది. ఇరాన్ బాగ్దాద్‌లోని అమెరికా రాయబార కార్యాలయంపై డ్రోన్ దాడి చేయగా, అక్కడి ఒక భవనంలో మంటలు చెలరేగాయి.
మరోవైపు, ఇజ్రాయెల్‌లోని టెల్ అవీవ్‌లో ఇరాన్ క్షిపణి శకలాలు పడటంతో రైల్వే స్టేషన్ తీవ్రంగా దెబ్బతిన్నది. ఈ క్రమంలో ఇజ్రాయెల్ ఇరాన్‌కు చెందిన ఇద్దరు ప్రముఖ వ్యక్తులు అలీ లారీజానీ మరియు జనరల్ గులాం రజా సులేమానీలను హతమార్చింది. దీనికి తోడు అమెరికా కూడా ఇరాన్‌పై వినాశకరమైన దాడికి దిగింది. హోర్ముజ్ జలసంధి సమీపంలోని ఇరాన్ ప్రాంతాలపై అమెరికా సైన్యం 5,000 పౌండ్ల బాంబులను ప్రయోగించింది.
ఇరాన్ మిసైల్ సైట్లపై దాడి: US CENTCOM ఒక ట్వీట్‌లో ఇలా పేర్కొంది: “కొన్ని గంటల క్రితం, హోర్ముజ్ జలసంధి సమీపంలోని ఇరాన్ తీరంలో ఉన్న మిసైల్ సైట్లపై అమెరికా సైన్యం 5,000 పౌండ్ల డీప్ పెనెట్రేటర్ ఆయుధాలను విజయవంతంగా ఉపయోగించింది. ఈ ప్రాంతాల్లోని ఇరాన్ యాంటీ-షిప్ క్రూయిజ్ క్షిపణులు హోర్ముజ్ జలసంధిలో అంతర్జాతీయ షిప్పింగ్‌కు ముప్పుగా మారాయి.”
ఇరాన్ ఇద్దరు ఉన్నతాధికారుల మృతి: రాత్రిపూట జరిగిన దాడుల్లో ఇద్దరు సీనియర్ ఇరాన్ భద్రతా అధికారులను హతమార్చినట్లు ఇజ్రాయెల్ ప్రకటించింది, ఇది ఇరాన్‌కు పెద్ద దెబ్బ. ఇరాన్ అత్యున్నత జాతీయ భద్రతా మండలి కార్యదర్శి అలీ లారీజానీ మరియు రివల్యూషనరీ గార్డ్ బాసిజ్ ఫోర్స్ చీఫ్ జనరల్ గులాం రజా సులేమానీలు మరణించినట్లు ఇజ్రాయెల్ రక్షణ మంత్రి ఇజ్రాయెల్ కాట్జ్ ధృవీకరించారు. యుద్ధం మొదటి రోజే అయాతుల్లా అలీ ఖమేనీ మరణించిన తర్వాత, లారీజానీ దేశంలో అత్యంత శక్తివంతమైన వ్యక్తిగా పరిగణించబడ్డారు.
ప్రతీకారం తీర్చుకుంటామని ఇరాన్ ప్రకటన: అలీ లారీజానీ మరియు బాసిజ్ ఫోర్స్ చీఫ్ మరణంతో ఇరాన్ నిప్పులు చెరుగుతోంది. లారీజానీ మరణానికి ప్రతీకారం తీర్చుకుంటామని ప్రకటించింది. ఇందులో భాగంగా ఇరాన్.. ఇజ్రాయెల్‌పై 61వ విడత క్షిపణి దాడులను చేపట్టింది. టెల్ అవీవ్ మరియు ఇతర నగరాలను లక్ష్యంగా చేసుకుని వరుసగా క్షిపణులను ప్రయోగించింది.