అంతర్జాతీయ వార్తలు: ప్రభుత్వ వ్యతిరేక నిరసనలతో ఇరాన్ ప్రస్తుతం ఒక ‘అంతర్యుద్ధం’ లాంటి పరిస్థితిని ఎదుర్కొంటోంది. దేశ అత్యున్నత నాయకుడు అయతుల్లా అలీ ఖమేనీ నేతృత్వంలోని మత పెద్దల పాలనను అంతం చేయాలని లక్షలాది మంది ఇరానీలు రోడ్లపైకి వచ్చారు. గత 15 రోజులకు పైగా జరుగుతున్న ఈ అల్లర్లలో ఎంతమంది మరణించారనే దానిపై ఇరాన్ ప్రభుత్వం మౌనం వహిస్తోంది.
అయితే, ఒక ఇరాన్ అధికారి సమాచారం ప్రకారం సుమారు 2 వేల మంది ప్రాణాలు కోల్పోయినట్లు తెలుస్తోంది. కానీ, ప్రవాస ఇరానీల సంస్థ ‘ఇరాన్ ఇంటర్నేషనల్’ సంచలన ఆరోపణలు చేస్తోంది. వారి వెబ్సైట్ ప్రకారం, ఈ నిరసనలలో ఇప్పటివరకు కనీసం 12,000 మంది మరణించారు. ఇరాన్ ఆధునిక చరిత్రలో ఇది అత్యంత భయంకరమైన మారణకాండ అని వారు పేర్కొంటున్నారు.
నిరసనలకు కారణం:
పశ్చిమ దేశాల ఆంక్షల వల్ల ఇరాన్ ఆర్థిక వ్యవస్థ కుప్పకూలింది. నిత్యావసర వస్తువుల ధరలు ఆకాశాన్ని తాకడంతో ప్రజల ఆగ్రహం కట్టలు తెంచుకుంది. నిరసనకారులు మసీదులు, రేడియో స్టేషన్లు మరియు సుమారు 180 అంబులెన్స్‌లకు నిప్పు పెట్టారు. షిరాజ్, కోమ్ మరియు హమేదాన్ నగరాల్లో భద్రతా సిబ్బంది కూడా నిరసనకారుల చేతిలో ప్రాణాలు కోల్పోయారు. పరిస్థితిని అదుపు చేయడానికి ప్రభుత్వం దేశవ్యాప్తంగా ఇంటర్నెట్‌ను నిలిపివేసింది. ఈ నిరసనల వెనుక అమెరికా, ఇజ్రాయెల్ హస్తం ఉందని ఇరాన్ ఆరోపిస్తోంది.
భద్రతా దళాల ఉక్కుపాదం:
ఇరాన్ విప్లవ దళం (IRGC) నిరసనకారులపై తీవ్ర హెచ్చరికలు జారీ చేసింది. ప్రభుత్వ ఆస్తులను ధ్వంసం చేసేవారిని ఉగ్రవాదులుగా పరిగణిస్తామని, దేశ భద్రత విషయంలో రాజీ పడేది లేదని స్పష్టం చేసింది. ఈ హెచ్చరికల తర్వాత, జనవరి 8 మరియు 9 తేదీల్లో భారీ ఎత్తున అణచివేత చర్యలు జరిగాయి. అలీ ఖమేనీ ప్రత్యక్ష ఆదేశాల మేరకు ఈ దాడులు నిర్వహించినట్లు సమాచారం. ఆసుపత్రులు క్షతగాత్రులతో నిండిపోగా, శవగారాలు (Morgues) మృతదేహాలతో నిండిపోయాయని ‘ఇరాన్ ఇంటర్నేషనల్’ పేర్కొంది. మరణించిన 12 వేల మందిలో అత్యధికులు 30 ఏళ్ల లోపు యువకులేనని వారు ఆవేదన వ్యక్తం చేస్తున్నారు.