ఇరాన్-అమెరికా యుద్ధంలో రష్యా పాత్ర గురించి ఇప్పటివరకు కేవలం చర్చలు మాత్రమే జరిగాయి. అయితే, ఇప్పుడు వినిపిస్తున్న ఒక వార్త నిజమైతే అది యుద్ధ గమనాన్ని మార్చేసే అవకాశం ఉంది.
తన తండ్రి స్థానంలో ఇరాన్ సుప్రీం లీడర్‌గా బాధ్యతలు చేపట్టిన నాటి నుండి మోజ్తబా ఖమేనీని లక్ష్యంగా చేసుకుని డొనాల్డ్ ట్రంప్ మరియు నెతన్యాహు వ్యూహాలు రచిస్తున్నారు. దాడుల్లో ఆయన గాయపడ్డారన్న వార్తలను ఇరాన్ ఖండించినప్పటికీ, కువైట్ వార్తాపత్రిక ‘అల్ జరీదా’ (Al Jarida) ఇప్పుడు ఒక సంచలన కథనాన్ని ప్రచురించింది. మోజ్తబా ఖమేనీ ప్రస్తుతం తన దేశంలో లేరని ఆ పత్రిక పేర్కొంది.
మొరాకో నుండి మాస్కోకు ఎలా వెళ్లారు? నివేదికల ప్రకారం, భద్రత మరియు ఆరోగ్య కారణాల దృష్ట్యా మోజ్తబాను అత్యంత రహస్యంగా రష్యాకు తరలించారు. ఒక రష్యన్ సైనిక విమానంలో ఆయనను మాస్కోకు తీసుకెళ్లారని, అక్కడ ఆయనకు శస్త్రచికిత్స జరిగిందని సమాచారం. నిరంతర బాంబు దాడులు మరియు వైమానిక దాడుల మధ్య ఇరాన్‌లో చికిత్స చేయడం అసాధ్యమని భావించి ఈ నిర్ణయం తీసుకున్నట్లు తెలుస్తోంది. ఇరాన్ ప్రెసిడెంట్ మసూద్ పెజెష్కియాన్‌తో పుతిన్ జరిపిన చర్చల తర్వాతే ఈ తరలింపు ప్రక్రియ జరిగిందని సమాచారం.
డొనాల్డ్ ట్రంప్ వ్యాఖ్యలు – ‘ఆయన బతికే ఉన్నారా?’ అమెరికా అధ్యక్షుడు డొనాల్డ్ ట్రంప్ ఇరాన్ సుప్రీం లీడర్ మోజ్తబా ఖమేనీ పరిస్థితిపై అనుమానాలు వ్యక్తం చేశారు. ఎన్బీసీ (NBC) న్యూస్‌కు ఇచ్చిన ఇంటర్వ్యూలో ట్రంప్ మాట్లాడుతూ.. “ఆయన అసలు బతికే ఉన్నారో లేదో నాకు తెలియదు. ఇప్పటివరకు ఎవరూ ఆయనను బయట చూడలేదు. ఒకవేళ ఆయన బతికే ఉంటే, తన దేశం కోసం తెలివిగా వ్యవహరించి లొంగిపోవాలి” అని అన్నారు. మోజ్తబా మరణించి ఉండవచ్చని లేదా తీవ్రంగా గాయపడి ఉండవచ్చని అంతర్జాతీయ మీడియాలో ఊహాగానాలు కొనసాగుతున్నాయి.