ప్రపంచమంతా ఉత్కంఠగా చూస్తున్న ఇరాన్ – అమెరికా ఘర్షణలో ఇప్పుడు ఒక ఊహించని ‘ట్విస్ట్’ చోటుచేసుకుంది. అమెరికా అధ్యక్షుడు డొనాల్డ్ ట్రంప్, పాకిస్థాన్ ఆర్మీ చీఫ్ జనరల్ ఆసిమ్ మునీర్‌తో గత ఆదివారం ఫోన్‌లో మాట్లాడారు. ఈ విషయాన్ని వైట్ హౌస్ కూడా ధృవీకరించింది. అంతర్జాతీయ రాజకీయ విశ్లేషకుల అభిప్రాయం ప్రకారం, ఇది ఒక ప్రాథమిక చర్చ మాత్రమే.
రహస్యం.. నో కామెంట్స్! వైట్ హౌస్ మీడియా సెక్రటరీ కరోలిన్ లీవిట్ ఈ చర్చల గురించి మాట్లాడుతూ.. “ఇవి అత్యంత సున్నితమైన దౌత్యపరమైన చర్చలు. అమెరికా ఎప్పుడూ మీడియా ద్వారా చర్చలు జరపదు. కాబట్టి వివరాలను ఇప్పుడు వెల్లడించలేము” అని తెగేసి చెప్పారు.
మధ్యవర్తిగా మారుతున్న పాకిస్థాన్? ఈ వివాదంలో పాకిస్థాన్ ఒక కీలక అడుగు వేసింది. అమెరికా మరియు ఇరాన్ అధికారుల మధ్య చర్చలు జరపడానికి అవసరమైన వేదికను, వాతావరణాన్ని తాము కల్పించగలమని పాక్ సంకేతాలు ఇచ్చింది. ఒకవైపు ఆర్మీ చీఫ్ ట్రంప్‌తో మాట్లాడగా, మరోవైపు పాక్ ప్రధాని షెహబాజ్ షరీఫ్ ఇరాన్ అధ్యక్షుడు మసూద్ పెజెష్కియాన్‌తో ఫోన్‌లో మాట్లాడారు. “ఇరాన్‌కు మేము అండగా ఉంటాం. చర్చలే దీనికి పరిష్కారం” అని షరీఫ్ భరోసా ఇచ్చారు.
ట్రంప్ దాడుల వాయిదా.. కానీ? ఇరాన్ విద్యుత్ కేంద్రాలపై దాడులు చేయాలనుకున్న నిర్ణయాన్ని ట్రంప్ తాత్కాలికంగా వాయిదా వేశారు. కొన్ని ‘ఉపయోగకరమైన’ చర్చల తర్వాతే ఈ నిర్ణయం తీసుకున్నట్లు ఆయన పేర్కొనడం గమనార్హం. దీని వెనుక పాకిస్థాన్ తెరవెనుక ప్రయత్నాలు ఏవైనా ఉన్నాయా అనేది ఇంకా సస్పెన్స్‌గానే ఉంది.
మరోవైపు, “మేము అమెరికాతో నేరుగా మాట్లాడటం లేదు” అని ఇరాన్ మొండిగా చెబుతున్నప్పటికీ, కొన్ని మిత్రదేశాల ద్వారా అమెరికా చర్చల కోసం ప్రతిపాదనలు పంపిందని ఇరాన్ విదేశాంగ ప్రతినిధి ఇస్మాయిల్ బాఘే అంగీకరించారు.