చెన్నై: అమెరికా – ఇరాన్ యుద్ధ ఉద్రిక్తతలతో ప్రపంచం మొత్తం వణికిపోతున్న తరుణంలో, భారతదేశంలో పెట్రోల్, డీజిల్ కొరత ఏర్పడుతుందనే భయం దావాగ్నిలా వ్యాపించింది.
దీనిపై తమిళనాడు ముఖ్యమంత్రి ఎం.కె. స్టాలిన్ స్పందిస్తూ.. “ఎవరూ భయపడాల్సిన అవసరం లేదు, మన వద్ద సరిపడా నిల్వలు ఉన్నాయి” అని భరోసా ఇచ్చారు. వాస్తవానికి, వంటగ్యాస్ (LPG) లాగా పెట్రోల్‌ను నిల్వ చేయడం కష్టమైన పనేమీ కాదు. ప్రస్తుతం భారత్ వద్ద దాదాపు 250 మిలియన్ బ్యారెళ్ల ముడి చమురు సిద్ధంగా ఉంది. ఇది రాబోయే 80 రోజులకు, అంటే దాదాపు 2.5 నెలల వరకు దేశ అవసరాలను ఎటువంటి అంతరాయం లేకుండా తీర్చగల ‘మెగా’ రక్షణను అందిస్తుంది.
ఏమిటా మాస్టర్ ప్లాన్?
ప్రస్తుత క్లిష్ట పరిస్థితుల్లో భారతదేశాన్ని ఆదుకుంటున్నది 2004లో మాజీ ప్రధాని మన్మోహన్ సింగ్ రూపొందించిన ‘Indian Strategic Petroleum Reserves’ (ISPRL) అనే మాస్టర్ ప్లాన్.
భూగర్భ నిల్వలు: విశాఖపట్నం, మంగళూరు వంటి ప్రాంతాల్లో భూగర్భ శిలలను తొలగించి నిర్మించిన భారీ గిడ్డంగులలో యుద్ధ కాలం లేదా అత్యవసర పరిస్థితుల కోసం చమురును నిల్వ చేశారు.
వ్యూహాత్మక ప్రయోజనం: అంతర్జాతీయ మార్కెట్‌లో ధరలు తగ్గినప్పుడు చమురు కొని నిల్వ చేసే ఈ వ్యూహం వల్ల, గల్ఫ్ దేశాల్లో సమస్యలు తలెత్తినా ప్రభుత్వం ఆందోళన చెందాల్సిన అవసరం ఉండదు. ఇది ఇతర దేశాలతో కొత్త ఒప్పందాలు చేసుకుని సరఫరాను పునరుద్ధరించడానికి ప్రభుత్వానికి తగిన సమయాన్ని ఇస్తుంది.
కాబట్టి, వదంతులను నమ్మి పెట్రోల్ బంకుల వద్ద గుమిగూడి ఆందోళన చెందాల్సిన అవసరం లేదన్నదే వాస్తవం!