మాస్కో/టెహ్రాన్: దాదాపు 40 రోజుల భీకర పోరు తర్వాత అమెరికా-ఇరాన్ మధ్య తాత్కాలిక యుద్ధ విరామం (Ceasefire) కుదిరిన వేళ, రష్యా చేసిన ఒక ప్రకటన ప్రపంచ దేశాల నిద్ర గెలుపుతోంది. ఇరాన్ దగ్గర సంప్రదాయ అణుబాంబు లేకపోవచ్చు, కానీ అంతకంటే శక్తివంతమైన ఆయుధం ఇరాన్ చేతిలో ఉందని రష్యా వెల్లడించింది. అదే ‘స్ట్రైట్ ఆఫ్ హార్ముజ్’ (Strait of Hormuz).
హార్ముజ్: ప్రపంచ ఆర్థిక వ్యవస్థకు ఉరితాడు!
రష్యా భద్రతా మండలి ఉపాధ్యక్షుడు దిమిత్రి మెద్వెదేవ్ సంచలన వ్యాఖ్యలు చేస్తూ.. “ఇరాన్ తన అసలు శక్తిని ప్రపంచానికి చూపించింది. ప్రపంచ చమురు సరఫరాలో అత్యంత కీలకమైన హార్ముజ్ జలసంధిని నియంత్రించడమే ఇరాన్ కొత్త అణుబాంబు” అని పేర్కొన్నారు.
- ప్రభావం: ఈ సముద్ర మార్గం మూతపడితే ప్రపంచ ఆర్థిక వ్యవస్థ కుప్పకూలడం ఖాయం. చమురు ధరలు ఆకాశాన్ని తాకుతాయి.
- ఇరాన్ హెచ్చరిక: సీజ్‌ఫైర్ కుదిరినప్పటికీ ఇరాన్ తన పట్టు సడలించడం లేదు. హార్ముజ్ గుండా వెళ్లే నౌకలు కచ్చితంగా తమ అనుమతి తీసుకోవాలని, లేదంటే కఠిన చర్యలు తప్పవని తేల్చి చెప్పింది.
రష్యా, చైనా అండ.. అంతర్జాతీయ వేదికపై రచ్చ!
హార్ముజ్ జలసంధిని స్వేచ్ఛా వాణిజ్యం కోసం తెరిపించాలని ఐక్యరాజ్యసమితి భద్రతా మండలిలో ప్రవేశపెట్టిన తీర్మానాన్ని రష్యా, చైనాలు అడ్డుకున్నాయి. దీంతో ఈ సమస్య మరింత జటిలంగా మారింది. మరోవైపు, ఫ్రాన్స్ అధ్యక్షుడు మెక్రాన్ మరియు జర్మనీ ఛాన్సలర్ ఫ్రెడరిక్ మెర్జ్ ఈ యుద్ధ విరామాన్ని స్వాగతించినప్పటికీ, లెబనాన్ పరిస్థితిపై ఆందోళన వ్యక్తం చేశారు.