అమెరికా అధ్యక్షుడు డొనాల్డ్ ట్రంప్ ఇరాన్‌పై తక్షణ సైనిక చర్య తీసుకోవాలని భావించారు. కానీ గత 48 గంటల్లో తెర వెనుక జరిగిన అసాధారణ దౌత్యం వల్ల ఈ ముప్పు ప్రస్తుతానికి తప్పింది. ఇందులో సౌదీ అరేబియా, ఖతార్, ఒమన్ మరియు ఈజిప్ట్ దేశాలు ‘సంకట మోచకుడి’ పాత్రను పోషించాయి.
దౌత్య వ్యూహం ఇలా సాగింది:
- అమెరికాకు హెచ్చరిక: ఈ నాలుగు దేశాలు వాషింగ్టన్‌ను తీవ్రంగా హెచ్చరించాయి. ఇరాన్‌పై దాడి జరిగితే ఆ మంటలు కేవలం మధ్యప్రాచ్యానికే పరిమితం కావని, ప్రపంచ చమురు ధరలు పెరిగి అమెరికా ఆర్థిక వ్యవస్థ కూడా దెబ్బతింటుందని స్పష్టం చేశాయి.
- ఇరాన్‌కు రెడ్ లైన్: అదే సమయంలో ఇరాన్‌ను కూడా హెచ్చరించాయి. ఒకవేళ అమెరికా దాడికి ప్రతిస్పందనగా పొరుగు దేశాల్లోని అమెరికా సైనిక స్థావరాలపై ఇరాన్ దాడి చేస్తే, అరబ్ దేశాలతో దౌత్య, ఆర్థిక సంబంధాలు శాశ్వతంగా తెగిపోతాయని తేల్చి చెప్పాయి.
- ట్రంప్ యూ-టర్న్: ఈ నాలుగు దేశాల ఒత్తిడి ఫలితంగా ట్రంప్ తన మొండి వైఖరిని వీడారు. ఇరాన్‌లో నిరసనకారుల మరణాలు తగ్గాయని కారణం చెబుతూనే, అమెరికా దాడి చేయబోదని స్వయంగా ఇరాన్ రాయబారికి ఫోన్ చేసి సమాచారం ఇచ్చారు.