మధ్యప్రదేశ్‌లోని ఇండోర్ నగరంలోని ప్రముఖ ప్రాంతమైన రాజ్‌వాడా నగర్ సేవా బస్ స్టేషన్‌ ఎప్పటిలాగే ప్రయాణికులు, ఆటోల రాకపోకలతో రద్దీగా ఉంది.
అక్కడ ఓ PM ఈ-సేవా ఎలక్ట్రిక్ బస్సును పక్కన పార్క్ చేసి ఉంచారు. అయితే ఎవరూ ఊహించని విధంగా ఆ బస్సు ఒక్కసారిగా కదలడం ప్రారంభించింది.
క్షణాల్లో అదుపు తప్పిన బస్సు వేగంగా ముందుకు దూసుకెళ్లి.. అక్కడ ఉన్న ఆటోలు, ప్రయాణికుల గుంపులోకి దూసుకెళ్లింది.
ఒక్కసారిగా జరిగిన ఈ ఘటనతో బస్ స్టేషన్‌లో ఉన్న ప్రజలు భయంతో కేకలు వేస్తూ అన్ని వైపులా పరుగులు తీశారు. అయితే బస్సు వేగం నుంచి తప్పించుకోలేక కొందరు దాని కింద చిక్కుకున్నారు.
బస్సు ఢీకొట్టడంతో అక్కడ ఉన్న పలు ఆటోలు తీవ్రంగా ధ్వంసమయ్యాయి. ఈ భయానక ఘటనకు సంబంధించిన దృశ్యాలు అక్కడి సీసీటీవీ కెమెరాల్లో రికార్డయ్యాయి. ప్రస్తుతం ఆ వీడియో సోషల్ మీడియాలో వైరల్‌గా మారింది.
ఈ ప్రమాదంలో ముగ్గురు వ్యక్తులు తీవ్రంగా గాయపడగా.. రెస్క్యూ సిబ్బంది వెంటనే వారిని ఆసుపత్రికి తరలించారు. అయితే చికిత్స పొందుతూ గణేష్ అనే వ్యక్తి మృతి చెందినట్లు సమాచారం. మరో ఇద్దరికి ఆసుపత్రిలో చికిత్స కొనసాగుతోంది.
ప్రమాదం జరిగిన వెంటనే బస్సు నుంచి దిగి అక్కడి నుంచి వెళ్లిపోయేందుకు ప్రయత్నించిన డ్రైవర్‌ను స్థానికులు పట్టుకున్నారు. సమాచారం అందుకున్న పోలీసులు ఘటనా స్థలానికి చేరుకుని డ్రైవర్‌ను తమ అదుపులోకి తీసుకున్నారు.
ఆగ్రహానికి గురైన కొందరు స్థానికులు ఎలక్ట్రిక్ బస్సును ధ్వంసం చేసినట్లు సమాచారం.
ఈ ఘటనపై సీనియర్ పోలీసు అధికారి దిషేష్ అగర్వాల్ మాట్లాడుతూ.. డ్రైవర్‌ను అదుపులోకి తీసుకుని విచారిస్తున్నామని తెలిపారు. డ్రైవర్ మద్యం సేవించి ఉన్నాడా లేదా అనే విషయాన్ని తెలుసుకునేందుకు వైద్య పరీక్షలు నిర్వహించనున్నట్లు చెప్పారు.
అలాగే బస్సులో బ్రేక్ వైఫల్యం జరిగిందా? లేదా మరేదైనా సాంకేతిక లోపం కారణమా? అనే కోణంలో కూడా దర్యాప్తు చేస్తున్నట్లు వెల్లడించారు.
పార్క్ చేసి ఉంచిన ఎలక్ట్రిక్ బస్సు ఒక్కసారిగా కదిలి ఈ స్థాయిలో ప్రమాదానికి కారణం కావడం స్థానికంగా తీవ్ర కలకలం రేపింది. ఈ ఘటన ఒక కుటుంబంలో విషాదాన్ని నింపడంతో పాటు.. ఎలక్ట్రిక్ వాహనాల భద్రతపై కూడా చర్చకు దారితీసింది.
Leave a Reply