బెంగళూరు: ‘ఉచితం’.. ఈ మాటకు ఉన్న మహిమే వేరు. అది రాజకీయ నాయకుల హామీ అయినా, హోటల్ యజమానుల ఆఫర్ అయినా.. జనం చెవులు రిక్కించి వింటారు. తాజాగా బెంగళూరులో అదే జరిగింది. నగరంలోని ప్రసిద్ధ ‘రామేశ్వరం కేఫ్’ కొత్త బ్రాంచ్ ప్రారంభోత్సవం సందర్భంగా ప్రకటించిన ‘ఫ్రీ మీల్స్’ ఆఫర్ కోసం జనం ఎగబడ్డారు. భానుడు భగభగలాడుతున్నా, సెగలు కక్కుతున్న ఎండను సైతం లెక్కచేయకుండా కిలోమీటర్ల మేర క్యూ లైన్లలో నిలబడటం ఇప్పుడు సోషల్ మీడియాలో హాట్ టాపిక్ గా మారింది.
బిజినెస్ టెక్నిక్.. సక్సెస్!
బెంగళూరులోని హోసూర్ రోడ్డులో రామేశ్వరం కేఫ్ కొత్త అవుట్‌లెట్ ప్రారంభమైంది. ఏదైనా కొత్త వ్యాపారం మొదలైనప్పుడు కస్టమర్లను ఆకర్షించడానికి డిస్కౌంట్లు ఇవ్వడం సర్వసాధారణం. కానీ, రామేశ్వరం కేఫ్ ఏకంగా ‘ఫ్రీ ఫుడ్’ అంటూ బంపర్ ఆఫర్ ఇచ్చింది. ఈ కేఫ్ లో తిండి అంటే రేట్లు మామూలుగా ఉండవు, సామాన్యులకు అది కొంచెం భారమే. అందుకే, ఉచితం అన్నప్పుడు ఒక్కసారైనా అక్కడి రుచి చూడాలని జనం ఫిక్సయ్యారు.
ఓటు వేయమంటే రారు కానీ..
వైరల్ అవుతున్న వీడియో చూస్తుంటే ఇది నిజంగానే జరిగిందా లేక ఏఐ (AI) సృష్టించిన వీడియోనా అనే అనుమానం రాక మానదు. ఎందుకంటే:
- కిలోమీటర్ల మేర క్యూ: హోటల్ ముందు నుంచి మొదలైన క్యూ రోడ్ల వెంట కిలోమీటర్ల మేర సాగింది.
- ఎండను లెక్కచేయని జనం: బెంగళూరులో ఇప్పుడు ఎండలు రికార్డు స్థాయిలో ఉన్నాయి. ఓటు వేయడానికి పోలింగ్ బూత్ వరకు వెళ్లడానికి బద్ధకించే జనం, ఈ ఉచిత భోజనం కోసం గంటల తరబడి ఎండలో నిలబడటం విశేషం.
నెటిజన్ల చురకలు..
ఈ వీడియోపై నెటిజన్లు రకరకాలుగా స్పందిస్తున్నారు.
“ఉచితం అంటే చాలు.. ప్రాణాలకైనా తెగిస్తారు” అని ఒకరు కామెంట్ చేయగా, “వచ్చే ఎన్నికల్లో ఓటు వేసిన వారికి పక్కనే ఫ్రీ మీల్స్ పెడితే 100 శాతం పోలింగ్ గ్యారెంటీ.. నాయకులు ఈ ప్లాన్ ఆలోచించండి” అని మరొకరు వ్యంగ్యంగా సలహా ఇచ్చారు.