ప్రియురాలు తన పెళ్లికి అడ్డంకిగా మారిందని ఒక కిరాతకుడు ఆమె తల నరికి హత్య చేసిన ఘటన సహరాన్‌పూర్‌లో తీవ్ర సంచలనం సృష్టించింది. సోమవారం నాడు పోలీసులు ఉమ యొక్క తల భాగాన్ని ఆమె కుటుంబ సభ్యులకు అప్పగించారు.
అసలేం జరిగింది?
సహరాన్‌పూర్‌కు చెందిన బిలాల్ అనే టాక్సీ డ్రైవర్, గత రెండేళ్లుగా ఉమ అనే మహిళతో సహజీవనం (Live-in Relationship) చేస్తున్నాడు. అయితే బిలాల్‌కు మరో యువతితో నిశ్చితార్థం జరిగింది. ఈ పెళ్లికి ఉమ అడ్డుపడుతుందన్న కోపంతో, డిసెంబర్ 6వ తేదీన ఆమెను విహారయాత్రకు తీసుకెళ్తానని నమ్మించి హిమాచల్ ప్రదేశ్ సరిహద్దులకు తీసుకెళ్లాడు.
హర్యానా సమీపంలో కారులోనే సీట్ బెల్ట్‌తో ఆమె గొంతు నులిమి చంపేందుకు ప్రయత్నించాడు. ఆమె ప్రాణాలతో మిగిలిపోతుందేమో అన్న అనుమానంతో, తన వద్ద ఉన్న మాంసం కోసే కత్తితో ఆమె గొంతు కోసి తల వేరు చేశాడు. మొండెం ఒక చోట, తల మరో చోట అడవిలో పడేశాడు. ఆదివారం బిలాల్ పెళ్లి జరగాల్సి ఉండగా, పోలీసులు అతడిని అరెస్ట్ చేశారు. దీంతో అతని పెళ్లి రద్దు కాగా, వధువుకు మరొకరితో వివాహం జరిపించారు.
15 ఏళ్ల క్రితమే తెగిపోయిన బంధం
ఉమ తల భాగాన్ని అందుకున్న ఆమె సోదరుడు టింకూ మీడియాతో మాట్లాడుతూ సంచలన విషయాలు వెల్లడించారు. 15 ఏళ్ల క్రితమే తమ కుటుంబానికి ఉమకు మధ్య బంధం తెగిపోయిందని చెప్పారు. “15 ఏళ్ల క్రితం ఆమె పెళ్లి రోజునే మొదటి ప్రియుడితో పారిపోయింది. ఆ రోజు మా కుటుంబ గౌరవం మంటగలిసింది. అప్పుడే ఆమె మాకు చనిపోయినట్లు భావించాం. ఆమె మొదటి భర్తకు విడాకులు ఇచ్చి బిలాల్‌తో కలిసి ఉంటోందని మాకు తెలియదు” అని ఆయన వాపోయారు.
కేవలం మానవత్వంతో, ఒక మనిషిగా ఆమెకు అంతిమ సంస్కారాలు నిర్వహించడానికి మాత్రమే తాము ఇక్కడికి వచ్చామని, ఆమెపై తమకు ఎలాంటి ప్రేమాభిమానాలు లేవని కుటుంబ సభ్యులు స్పష్టం చేశారు. హర్యానా పోలీసులు మూడు రోజుల క్రితమే గుర్తుతెలియని మృతదేహంగా ఆమె మొండెం భాగానికి అంతిమ సంస్కారాలు నిర్వహించారు. ఇప్పుడు దొరికిన తల భాగాన్ని కుటుంబ సభ్యులు సహరాన్‌పూర్ తీసుకువచ్చి దహన సంస్కారాలు చేశారు.
సాక్ష్యాల చెరిపివేత
హత్య చేసిన తర్వాత బిలాల్ తన మొబైల్‌ను ఫార్మాట్ చేశాడు. ఉమకు సంబంధించిన ఫోటోలు, నంబర్లు ఇతర ఆధారాలు దొరకకుండా జాగ్రత్త పడ్డాడు. ప్రస్తుతం పోలీసులు అతని మొబైల్‌ను స్వాధీనం చేసుకుని దర్యాప్తు చేస్తున్నారు.