కేరళలోని చెమ్మడ్‌లో శనివారం (ఫిబ్రవరి 7న) ఉల్లిపాయల లోడుతో ఉన్న ఒక లారీ నుండి 10,500కు పైగా జిలెటిన్ స్టిక్స్ మరియు డెటొనేటర్లను పోలీసులు స్వాధీనం చేసుకున్నట్లు పిటిఐ (PTI) వార్తా సంస్థ నివేదించింది.
పోలీసుల కథనం ప్రకారం, ఒక ఇటుకల తయారీ కేంద్రం వద్ద నిలిపి ఉంచిన లారీలో సుమారు 245 పెట్టెలను కనుగొన్నారు. వీటిలో 10,500 కంటే ఎక్కువ జిలెటిన్ స్టిక్స్, డెటొనేటర్లు మరియు వైర్లు ఉన్నాయి. ఈ లారీ యజమాని అయిన ఒక మహిళను పోలీసులు అరెస్ట్ చేశారు. తిరురంగడి పోలీస్ స్టేషన్ అధికారులు తెలిపిన వివరాల ప్రకారం, ఉల్లిపాయల లోడుతో ఉన్న ఈ లారీ శుక్రవారం అర్థరాత్రి ఇటుకల తయారీ కేంద్రానికి చేరుకుంది.
ముందస్తు సమాచారం అందుకున్న పోలీసులు అక్కడికి చేరుకోగానే, లారీ నుండి సరుకును అన్‌లోడ్ చేస్తున్న వ్యక్తులు పరారయ్యారు. శనివారం ఉదయం పోలీసులు తనిఖీ చేయగా, ఉల్లిపాయల బస్తాల మధ్య దాచి ఉంచిన పేలుడు పదార్థాల పెట్టెలు బయటపడ్డాయి. వీటిని అక్రమ మైనింగ్ కోసం కేరళ వెలుపల నుండి తీసుకువచ్చినట్లు పోలీసులు భావిస్తున్నారు.
పాలక్కాడ్‌లో కూడా భారీగా పేలుడు పదార్థాల గుర్తింపు
కొద్దిరోజుల క్రితం పాలక్కాడ్ పట్టణం వద్ద కూడా ఇలాంటి ఘటనే వెలుగుచూసింది. పుచ్చకాయల లోడు కింద దాచి ఉంచిన 100కు పైగా జిలెటిన్ స్టిక్స్ పెట్టెలు, 20కి పైగా డెటొనేటర్ల పెట్టెలను పోలీసులు సీజ్ చేశారు. కోయంబత్తూర్ నుండి త్రిసూర్ లోని ఒక క్వారీకి వీటిని తరలిస్తున్నట్లు డ్రైవర్ ప్రాథమిక విచారణలో వెల్లడించాడు.