చెన్నై: 1977 తర్వాత తమిళనాడులో మొదటిసారిగా ఒక భారీ రాజకీయ మార్పు జరగడం ఖాయంగా కనిపిస్తోంది. తమిళగ వెట్రి కళగం (TVK) అధినేత విజయ్ నేతృత్వంలో కొత్త ప్రభుత్వం కొలువుదీరబోతుందనే సంకేతాలు వెలువడుతున్నాయి.
గడిచిన 60 ఏళ్లలో ద్రావిడ పార్టీలు (DMK, AIADMK) లేని మొదటి ప్రభుత్వం ఏర్పడటం దాదాపు ఖాయమైంది. గతంలో ఎంజీ రామచంద్రన్ (MGR) మాత్రమే పార్టీ పెట్టిన మొదటి ఎన్నికల్లోనే విజయం సాధించి ముఖ్యమంత్రి అయ్యారు. సరిగ్గా 49 ఏళ్ల తర్వాత, 2026లో విజయ్ అదే చరిత్రను పునరావృతం చేయబోతున్నారు. ఎందుకంటే, అధికార డీఎంకేకు చెందిన అగ్ర నాయకులు, మంత్రులు సైతం ఓట్ల లెక్కింపులో వెనుకంజలో ఉన్నారు.
తమిళ రాజకీయ చరిత్రను గమనిస్తే, 1977లో ఒక నటుడు సొంత పార్టీ పెట్టి సీఎం అయ్యారు. ఆ తర్వాత 50 ఏళ్లుగా మారని రాజకీయ చిత్రం ఇప్పుడు మారుతోంది. ఇది కేవలం ఓట్ల తగ్గుదల మాత్రమే కాదు, ఇదొక ‘రాజకీయ సునామీ’ అని విశ్లేషకులు అభివర్ణిస్తున్నారు. ఇదే ట్రెండ్ కొనసాగితే, 60 ఏళ్ల ద్రావిడ పార్టీల పాలనకు తెరపడి, ఒక ప్రత్యామ్నాయ రాజకీయ శకం మొదలవుతుంది.
చెన్నైలో క్లీన్ స్వీప్!
చెన్నైలోని మొత్తం 16 నియోజకవర్గాల్లోనూ టీవీకే ఆధిక్యంలో ఉండటం విశేషం. దశాబ్దాలుగా డీఎంకేకు కంచుకోటగా ఉన్న చెన్నైలో ఆ పార్టీ మూడవ స్థానానికి పడిపోవడం గమనార్హం. 1967 నుండి సాగుతున్న డీఎంకే-అన్నాడీఎంకేల గొలుసుకట్టు పాలనను విజయ్ బద్దలు కొట్టారు. యువత మరియు కొత్త ఓటర్లు ఏకపక్షంగా విజయ్ వైపు నిలబడటమే ఈ మార్పుకు కారణమని తెలుస్తోంది.
ఎంజీఆర్ వారసుడిగా విజయ్?
నాడు ఎంజీఆర్ ఎలాగైతే సామాన్య ప్రజలను, ముఖ్యంగా మహిళా ఓటర్లను ఆకట్టుకున్నారో, నేడు విజయ్ కూడా అదే తరహాలో ప్రజాదరణ పొందారు. “ఎంజీఆర్ తర్వాత ఎవరు?” అనే ప్రశ్నకు తమిళ ప్రజలు తమ ఓట్ల ద్వారా “విజయ్” అని సమాధానం చెప్పినట్లు కనిపిస్తోంది. నేడు సాయంత్రానికి ఫలితాలు అధికారికంగా వెలువడితే, 1977 తర్వాత తమిళనాడు చరిత్రలో ఇది అతిపెద్ద రాజకీయ మార్పుగా నిలిచిపోతుంది.